Çingiz Hüseynzadə: “İnanıram ki, futbolumuz bundan sonra da inkişaf edəcək”

“Bu gün Azərbaycan idmanının və futbolunun ən möhtəşəm günlərindən biridir. Bu, nəinki illik konfransdır, məncə, bu, həm də son 16 ilin hesabatıdır”.

Futbolxeber.az saytının məlumatına görə, bu sözləri Milli Olimpiya Komitəsinin baş katibi Çingiz Hüseynzadə AFFA-nın Hesabat-Seçki Konfransında çıxışı zamanı deyib.

O bildirib ki, son illər Azərbaycan futbolu inkişaf edir: “İllər keçir, Azərbaycan futbolu inkişaf edir. Biz hardan bura gəlib çıxmışıq, bunu unutmamalıyıq. Yadıma bir hadisə düşdü. 30 il əvvəl mən Prezident Aparatında çalışırdım. Günlərin birində Aparatda canlanma oldu. Azərbaycan millisi İsraillə oynamalı idi. Lakin UEFA bizim heç bir stadionumuzu qəbul etmədi. Ulu öndər Heydər Əliyev məni çağırdı ki, niyə bizim bir standartlara uyğun stadionumuz yoxdur? Həmin vaxt Tofiq Bəhramov adına Respubluka stadionunda qoyunlar otlayırdı. Sonra Ulu öndər soruşdu ki, bəs Sumqayıtdakı stadionun vəziyyəti necədir? Bildirdik ki, orda da eyni vəziyyətdir. Yekunda oyunu Trabzonda keçirməli olduq. Mən bunu elə-belə xatırlamadım. Bu gün Azərbaycan futbolda sözünü deyib. Bütün bunlar son 15-16 ildə görülən işlərin nəticəsidir. Mən bu gün yeni seçiləcək heyətlə uğurlar arzu etməklə yanaşı, geridə qalan müddətdə Azərbaycan futboluna hərtərəfli dəstək olmuş insanlara təşəkkür etmək istəyirəm. Məhz onların əməyinin nəticəsidir ki, biz indi bu səviyyəyə çatmışıq. Bəzən mediada tənqidlər olur. Yığmadan narazılıq bildirilir. Aydın məsələdir ki, iş olan yerdə tənqid də olur. Olimpiya Komitəsində adət etmişik. Ollimpiya çempionlarını sayı artdıqca tənqidlərin də sayı artır. Mən həm öz adımdan, həm Milli Olimpiya Komitəsi adından AFFA rəhbərliyinə uğurlar arzu edirəm. İnanıram ki, futbolumuz bundan sonra da inkişaf edəcək”.