Moutinyo: “Nə qələbə layiq idik, nə də heç-heçəyə”

“Biz fərqli oyun göstərmək istəyirdik. Yaxşı nəticə əldə etməli idik, amma alınmadı”.

Futbolxeber.az saytının məlumatına görə, bu sözləri "Braqa"nın məşhur futbolçusu Joao Moutinyo UEFA Avropa Liqasının pley-off mərhələsində öz meydanlarında "Qarabağ"a uduzduqları oyundan (2:4) sonra Portuqaliya mətbuatına açıqlamasında deyib.

Portuqaliya millisinin sabiq üzvü bildirib ki, 2:4 hesablı məğlubiyyət işlərini çox çətinləşdirib:  "Biz nə qələbəyə, nə də heç-heçəyə layiq deyildik. Cavab matçında gücümüzü 100 faiz ortaya qoymalıyıq. Bu, təkcə keyfiyyətlə bağlı deyil, həm də iradə və ruhla bağlıdır. 2:4 hesablı məğlubiyyət vəziyyəti çox çətinləşdirəcək. Amma məqsəd varsa, ümid də var. Bunun öhdəsindən gəlmək üçün mən də daxil olmaqla cavab matçına fərqli münasibət göstərməliyik”.

Qeyd edək ki, komandalar arasında cavab matçı fevralın 22-də Bakıda keçiriləcək.