“Turan Tovuz”un kapitanı: “Çempionatda əlimizi yanımıza salıb oturmaq fikrimiz yoxdur”

“Turan Tovuz”un kapitanı Şəhriyar Əliyevin Futbolxeber.az saytına müsahibəsi

- Antalyada 2 həftəlik təlim-məşq toplanışını başa vurduz. Ümumi olaraq hazırlıq prosesini necə dəyərləndirirsiz?

- 2 həftəlik təlim-məşq toplanışımız yaxşı keçdi. Çatışmayan cəhətlərimiz üzərində çalışdıq. Nöqsanlarımızı analiz etdik. 2 həftə ərzində çempionata maksimum hazırlaşmaq üçün bacardığımızı etdik. Düşünürəm ki, yaxşı toplanış oldu, ciddi zədəli futbolçularımız olmadı.

- Bu dəfə qış fasiləsi bir qədər az oldu. Bu məqam toplanış zamanı hər hansı çətinlik yaratmadı?

- Düzdür, fasilə müddəti az oldu. Halbuki əvvəl istirahət üçün daha çox vaxt olurdu. Yanvarın 2-dən bir aradayıq. Bu gün vətənə dönürük. Hesab edirəm ki, bu təlim-məşq toplanışı futbolçuların formaya düşməsi baxımından çox faydalı olacaq.

- Antalyada üç yoxlama matçı keçirdiz. Bu qarşılaşmaları ümumilikdə necə qiymətləndirirsiz?

- Yoldaşlıq görüşlərində nəticə önəmli olmur. Əsasən zəif və güclü cəhətləri analiz etməyə çalışırdıq. Bunu məşqçilər komandaya izah edirlər. Bu oyunlarda futbolçuların fiziki durumu, taktiki və texniki cəhətdən düzgün oynaması daha önəmlidir.

- Hər nə qədər yoxlama matçları olsa da, 3 oyunda 3 məğlubiyyət çempionat öncəsi həyəcan siqnalı deyil?

- Düşünürəm ki, nəticə önəmli deyil. Düzdür, qələbə həmişə gözəldir. Amma biz hər 3 oyunda zəif cəhətlərimizi təhlil etdik. Çalışacağıq ki, çempionat oyununa kimi ən yaxşısını edək.

- Kapitan kimi mövsümün ikinci yarısı öncəsi komandanın hazırkı məqamda hansı müsbət və çatışmayan cəhətlərini qeyd edə bilərsiz?

- Çatışmayan cəhətlərimizi bizə baş məşqçimiz deyir. Mənim bunu deməyim bir qədər düzgün olmaz. (gülür) Baş məşqçi hər mövqedə olan səhvlərimizi bizə izah edir.

- Mövsümün ikinci yarısı üçün “Turan Tovuz”un hədəfi nədən ibarətdir?

- Mövsümün ikinci yarısı çox çətin olacaq. Qarşıdakı 2 dövrə bütün komandalar üçün ağır keçəcək. Klubların əksəri heyətini gücləndirib. Biz də komanda şəklində yaxşı oynayıb xallar qazanmağa çalışacağıq.

- Ötən mövsümdən fərqli olaraq bu dəfə kubokla erkən vidalaşdız. Bu məqam çempionatda lehinizə olacaq, yoxsa əleyhinizə?

- Kubokda mərhələ keçmək istərdik. Təəssüf ki, 1/8 finalda “Zirə”yə uduzduq. Çempionatda əlimizi yanımıza salıb oturmaq fikrimiz yoxdur. Mümkün olduğu qədər xallarımızın sayını artırmağa çalışacağıq. İlk 2 oyun daha vacibdir. Həmin matçlarda müsbət nəticə komandaya inam, ruh yüksəkliyi verəcək. İlk rəqibimiz “Kəpəz” olacaq. Gəncə təmsilçisi ilə çətin matçın çətin keçəcəyi bizə məlumdur. Ona görə də bu oyuna yaxşı hazırlaşıb qələbə qazanmağa çalışacağıq.

Azad NURİYEV