Ayxan Abbasov: “Onun barəsində 15 gündən sonra qərar verəcəyik” (MÜSAHİBƏ)

“Turan Tovuz”un baş məşqçisi Ayxan Abbasovun Futbolxeber.az saytına müsahibəsi

- Komandanız Antalyadakı hazırlıq prosesi çərçivəsində ilk yoxlama oyununu (0:2) keçirdi. “Voluntari” ilə matçı necə şərh edərdiz?

- İlk oyunumuz idi. Ağır məşqlərdən sonra belə bir oyuna çıxmaq futbolçularım üçün olduqca çətin olur. 90 dəqiqə mübarizə apardıq. Məğlub olmaq istəmirdik, amma rəqib bizdən daha hazırlıqlı idi. Bu səbəbdən matçı uduzduq. Yoldaşlıq görüşlərində nəticə bir o qədər önəmli olmur. Futbolçuların yanaşması, tapşırıqları yerinə yetirməsi pis alınmadı.

- Komandanızın oyununda hansı müsbət məqamları qeyd edərdiz? Eləcə də hansı çatışmazlıqlar üzə çıxdı?

- Çatışmazlıqlar həmişə olur, həmişə də olacaq. Çalışırıq ki, bunları azaldaq. Buraxdığımız qollar fərdi səhvlərdən oldu. Yaxşı məqam odur ki, rəqib yaxşı müdafiə olunsa da, onların müdafiə xəttini yarmağa cəhd göstərdik. Hücumlarımız oldu, ancaq sonluq yaxşı alınmadı.

- Bilirik ki, “Voluntari” ilə oyun hava şəraitinə görə 1 gün sonraya keçirildi. Həm bu məqam, həm ümumilikdə hava şəraiti hazırlığınıza nə dərəcə mənfi göstərir?

- İstəyərdik ki, həmin gün oynayaq. Ancaq növbəti gün də aktiv oyun göstərdik. Bu fakt bizə çox təsir göstərmədi.

- Komandanızın üzvü Sərtan Taşkın Türkiyənin “Manisa” klubuna keçir...

- Bəli, Sərtan Taşkın bizdən ayrıldı, özü bu barədə bizə müraciət etdi. Klub olaraq ona mane olmadıq, getməyi üçün şərait yaratdıq. Bu dəqiqə heç bir futbolçunu itirmək istəmirdik. Yenə də ona uğurlar arzulayıram.

- Mətbuatda həm də Piruzi Marakvelidze ilə vidalaşmaq istədiyiniz barədə məlumat yayılmışdı. Bu, nə dərəcədə doğrudur?

- O, hələ ki zədəlidir. 15 gündən sonra Bakıya gələcək. Yalnız bundan sonra məsələ ilə bağlı qərar verəcəyik.

- Braziliyalı Aleks Souzanı artıq “Turan Tovuz”un futbolçusu saymaq olar?

- Bəli, Aleks Souza "Turan Tovuz"la 2 il yarımlıq müqavilə bağlayacaq.

Azad NURİYEV