“Qurban Qurbanovun parlaq futbol karyerasının bir parçası olmaq mənim üçün fəxrdir”

“Filmi izlədim. Əla təsir bağışladı”.

Futbolxeber.az saytına açıqlamasında bu sözləri “Qarabağ”ın sabiq futbolçusu Rəşad Sadıqov Ağdam klubunun baş məşqçisi Qurban Qurbanova həsr edilmiş “Stadionlar səssiz olanda” filmi barədə danışarkən deyib.  

O bildirib ki, bu film Qurbanovun motivasiyasını daha da artıracaq: “Hamımız fəxr edirik ki, Qurban Qurbanova belə diqqət ayrılıb. Qurban müəllimi yaxşı tanıyan biri  insan kimi deyə bilərəm ki, bu film onun üçün daha da motivasiya olacaq. Təbii ki, buna qədər də bütün gücü ilə çalışırdı, bundan sonra daha əzmlə işləyəcək”.

Rəşad Sadıqov filmdəki prototipi olan 14 nömrədən də söz açıb: “14 nömrə xoş təsir bağışladı. O illəri, o günləri, o oyunları xatırlamaq hər zaman xoşdur. Qurban müəllimin parlaq futbol karyerasının bir parçası olmaq mənim üçün fəxrdir. Filmdə Maksim Medvedev, Riçard Almeyda da canlanırdı. Bunlar hamısı o illəri danılmaz qəhrəmanlarıdır”.

Fərəc ASLANOV