Xankəndidəki ilk oyunun vaxtı məlum oldu: bütün detallar “Futbolxeber”də!

Azərbaycanın ərazi bütövlüyünü bərpa etməsindən sonra Xankəndi şəhərində yerləşən stadionda keçiriləcək ilk oyunun vaxtı məlum olub.

Futbolxeber.az saytının əldə etdiyi məlumata görə, Xankəndidəki ilk matç dekabrın 21-də keçiriləcək. Bu məsələ artıq tam həll dəqiqləşib.

Həmin gün Azərbaycan Kubokunun 1/8 final mərhələsi çərçivəsində “Qarabağ” meydana çıxacaq. Ağdam klubunun həmin matçdakı rəqibi MOİK - Ağdaş/Cəbrayıl cütünün qalibi arasında keçiriləcək oyundan sonra müəyyənləşəcək.

Görüşün CBC Sport kanalı vasitəsi ilə yayımlanacağı da dəqiqləşib. Bir neçə gün əvvəl kanalın əməkdaşları Xankəndi şəhər stadionunda olublar və canlı yayımla bağlı bütün lazımi təlimatları veriblər. Hələlik arenanın işıqlandırma sistemləri tam hazır olmadığından Azərbaycan Kubokunun 1/8 final oyunu gündüz saatlarında keçiriləcək. Qarşılaşmanın 14:00-da start götürəcəyi bildirilir.

Əlavə edək ki, hazırda Xankəndi şəhər stadionunda təmir işləri aparılır. Stadionun “qondarma rejim”in bayrağı ilə örtülü tribunaları sökülüb yeniləri ilə əvəzlənib. Arenanın ot örtüyünə, eləcə də paltardəyişmə otaqlarına, həmçinin media tribunasına da əl gəzdirilir.  

İBRAHİM