“Qarabağ”ın qapıçısı: “Şahruddinlə bir-birimizə videolar göndəririk” (MÜSAHİBƏ)

“Kəpəz” üzərində böyükhesablı qələbə qazandıq. Bu nəticəyə görə məmnunuq”.

Futbolxeber.az saytına müsahibəsində bu sözləri “Qarabağ”ın qapıçısı Amin Ramazanov Azərbaycan Premyer Liqasının XII turunda “Kəpəz”i 7:1 hesabı ilə darmadağın etdikləri oyun barədə danışarkən deyib.  

Gənc qapıçı qapısında gördüyü qolun kuryoz alındığını bildirib: “Təbii ki, qapımı toxunulmaz saxlamaq istərdim. Amma qol bir qədər kuryoz oldu. Zərbədən sonra toxunuş var idi”.

O, öz oyununu qiymətləndirmək istəməyib: “Çıxışım barədə nəsə deməyim düz olmaz. Bu haqda danışmağı xoşlamıram. Oyunuma məşqçilər qiymət versə, daha yaxşı olar”.  

20 yaşlı qolkiper klubdakı rəqabətdən barədə da danışıb: “Komandamızda məndən başqa 2 qapıçı var. Hər ikisi də kifayət qədər güclüdür, təcrübəlidir. Onlardan hər zaman öyrənməyə çalışıram. Şahruddin Məhəmmədəliyevlə daha yaxınıq. Bugünkü gündə də onunla tez-tez danışırıq. Daim onunla oyunları müzakirə edirik. İstər Azərbaycan çempionatının, istərsə də Türkiyə Superliqasının matçlarını. Bir-birimizə tez-tez videolar göndəririk, müəyyən epizodları müzakirə edirik”.

Amin Ramazanov gələn həftə UEFA Avropa Liqasının qrup mərhələsinin dördüncü turu çərçivəsində “Bayer Leverkuzen”ə qarşı keçiriləcək matçla bağlı da fikirlərini bölüşüb: “100 faiz öz oyunumuzu göstərməyə çalışacağıq. Bəli, “Bayer Leverkuzen” çox güclü rəqibdir. Lakin bu dəfə öz azarkeşlərimiz önündə oynayacağıq. Düşünürəm ki, budəfəki matç nisbətən asan keçəcək”.

Fərəc ASLANOV