Otto Con: “Səbail”lə oyunun taleyini ilk hissədə həll etməliydik”

“Çox çətin oyun alındı. Yaxşı çıxış etsək də, yekunda xalsız qaldıq və bu nəticə bizi heç cür razı salam bilməz”.

Futbolxeber.az saytına müsahibəsində bu sözləri “Turan Tovuz”un hücumçusu Otto Con Azərbaycan Premyer Liqasının XII turunda “Səbail”ə 1:2 hesabı ilə uduzduqları oyunu şərh edərkən deyib.

Nigeriyalı forvard qeyd edib ki, matçın taleyini ilk hissədə həll etməli idilər: “Qarşılaşmaya yaxşı başladıq. Hissənin ortalarında hesabı açdıq. Bundan sonra üstünlüyümüzü artırmaq üçün şanslarımız oldu. Təəssüf ki, onları dəyərləndirə bilmədik. Halbuki artıq ilk hissədə oyunun taleyini həll etməliydik. Vaxtında ikinci qolu vursaydıq, rəqib heç cür toparlana bilməyəcəkdi”.

O.Con “Səbail” - “Turan Tovuz” oyununun ən çox müzakirə olunan epizoduna – Səlahət Ağayevin cərimə meydançasından kənarda əllə oyuna görə qırmızı deyil, sarı vərəqə almasına da toxunub: “Məncə, hakim o epizodda qırmızı vərəqə verməli idi. Özü də gedib VAR-da epizodun təkrarına baxdı. Amma bu barədə çox danışmaq istəmirəm. Çünki meydanda mən öz işimi görürəm, hakim də öz işini”.

25 yaşlı futbolçu növbəti turda “Sabah”a qarşı matçın onlar üçün çətin keçəcəyini bildirib: “Həftə ərzində bu oyuna hazırlaşacağıq. “Sabah”la qarşılaşma da çox çətin keçəcək. R  əqib güclüdür. Bununla belə, doğma meydanda oynayacağıq və azarkeşlərimizi sevindirmək üçün əlimizdən gələni edəcəyik”.  

Fərəc ASLANOV