Təklif bizdən, reallaşdırmaq “Neftçi”dən

Bu günlərdə milli komandamızın sabiq üzvü Ruslan Abışov peşəkar futbolçu karyerasını başa vurduğunu açıqladı. Sosial şəbəkə hesabında bununla bağlı paylaşım edən veteran futbolçunun bir fikri böyük marağa səbəb oldu: “Əslində könül istərdi ki, əynimdə yetirməsi və qatı azarkeşi olduğum “Neftçi” forması ilə futbolla və sadiq azarkeşlərlə vidalaşım. Amma qismət deyilmiş”.

Bu, Ruslanın tam haqqıdır. Abışov peşəkar futbolçu karyerasına məhz “Neftçi”də başlayıb. 7 il ərzində “ağ-qaralar”ın heyətindəki inamlı oyunu ilə tanınıb. Necə deyərlər, Ruslanı Ruslan edən məhz “Neftçi” olub. Sonradan bir çox klubların heyətində çıxış etsə də, Abışov hər zaman “Neftçi”li kimi tanınıb. O, həm də azsaylı futbolçulardandır ki, rəqib komandanın heyətində meydana çıxdığı matçlarda belə flaqman azarkeşlərindən hər zaman sevgi görüb. Fanatların Abışova hörməti bu gün də var və belə bir vida tədbirinin keçirilməsi hər iki tərəfin ürəyincə olardı.

“Neftçi” də sabiq müdafiəçisinin bu istəyinə biganə qalmayıb. Dünən “ağ-qaralar”ın baş icraçı direktoru Fərrux Mahmudov Futbolxeber.az saytına açıqlamasında belə bir tədbirin nəzərdə tutulduğunu bildirdi: “Ruslan Abışov üçün vida tədbiri təşkil etmək fikrimiz var. Kommunikasiya şöbəsi hazırda bu barədə fikirləşir. Lakin vida tədbirinin hansı formatda olacağı hələlik dəqiqləşməyib. Bu məsələ müzakirə olunur”.

Olmasın vida oyunu, olsun vida tədbiri. Əsas odur ki, “Neftçi” Abışovu rəsmi şəkildə yola salsın, futbolçunun da azarkeşlərlə vidalaşmaq arzusu reallaşsın. İndi əsas sual vida tədbirinin hansı formada təşkil ediləcəyidir. Əslində bu, çətin bir iş deyil. “Neftçi”nin növbəti ev oyunlarından birində - məsələn, noyabrın 11-də 13-cü turda “Sumqayıt”la, yaxud noyabrın 26-da 14-cü turda “Araz-Naxçıvan”la matçdan öncə bu tədbiri təşkil etmək mümkündür. Hər iki qarşılaşmada “Neftçi” ev sahibi olacaq. Matçdan öncə klub rəhbərliyi Ruslan Abışova flaqmanın çərçivəyə salınmış formasını təqdim edə bilər. Əminik ki, bu, Ruslan üçün çox dəyərli hədiyyə olacaq. Ardınca isə veteran futbolçu “Neftçi” fanatları ilə vidalaşa bilər.

Lakin biz təklif edərdik ki, “Neftçi” bu tədbiri noyabrın 18-də keçirilməsi planlaşdırılan “Zenit”lə matçdan öncə təşkil etsin. Ona görə ki, Sankt-Peterburq klubu ilə matça böyük maraq olacaq. Daha böyük kütlə “ağ-qaralar”ın sabiq futbolçusuna necə dəyər verdiyini görəcək. Böyük ehtimalla, “Zenit”lə matçda stadiona yuxarıda qeyd etdiyimiz 2 çempionat matçından daha çox fanat toplaşacaq. Digər tərəfdən isə, Ruslan Abışov “Zenit”in təmsil etdiyi Rusiya futbolu üçün yad sima deyil. 36 yaşlı müdafiəçi 2013-cü ildə bu ölkənin “Rubin” klubunda çıxış edib. “Neftçi”nin sabiq futbolçusuna qarşı jesti təkcə Azərbaycan deyil, Rusiya mətbuatında da işıqlandırılacaq...    

Necə deyərlər, təklif bizdən, reallaşdırmaq “Neftçi”dən. Təbii ki, bu, sadəcə bir təklifdir. Əsas odur ki, bu tədbir reallaşsın. “Neftçi” Ruslan, Ruslan da “Neftçi” qarşısındakı son borcunu yerinə yetirsin...

FUTBOLXEBER.AZ