"Neftçi" Anderssonu təqdim etdi

"Neftçi"nin yeni idman direktoru Yens Anderssonun təqdimat mərasimi keçirilib.

Futbolxeber.az saytının məlumatına görə, tədbirdə isveçli mütəxəssislər yanaşı, baş icraçı direktoru Fərrux Mahmudov, baş məşqçi Adrian Mutu da iştirak edib.

“Neftçi”nin mətbuat xidmətinin rəhbəri Emin Əfəndi tədbiri açıq elan etdikdən sonra sözü F.Mahmudova verib. Klub rəhbəri inandığını bildirib ki, Y.Andersson "Neftçi"nin akademiyasının inkişafında rol oynayacaq.

O qeyd edib ki, Anderssonu AİK və "Hayduk"dakı işinə görə kluba cəlb ediblər: "Əgər o, buradadırsa, Anderssonun əvvəlki iş yerlərində az işləməsi məni qorxutmur".

Mahmudov "Neftçi"nin əsas komandasının hazırkı çıxışları barədə danışarkən baş məşqçi Adrian Mutu və futbolçulara inandıqlarını söyləyib. Liderdən cəmi 5 xal geridə olduqlarını bildirən F.Mahmudov əsas mübarizənin hələ irəlidə olduğunu qeyd edib. O, azarkeşlərin "Neftçi"ni daim zirvədə görmək istədiklərini söyləyib. Klub rəhbəri fanatları səbrli olmağa çağırıb: "Nəticələr zamanla gələcək. İnanıram ki, layiq olduğumuz yeri tutacağıq".

Tədbirdə Yens Andersson da çıxış edib. O, əvvəlcə "Neftçi"də olmaqdan şad olduğunu deyib. İsveçli mütəxəssis ümid etdiyini bildirib ki, qazandığı təcrübə hər iki tərəf üçün xeyirli olacaq.

Yens Andersson klubla tanış olduğunu, fəaliyyətinin "Neftçi"nin akademiyasını da əhatə edəcəyini vurğulayıb. O deyib ki, "Neftçi" ilə əməkdaşlığının uğurlu olacağına ümid edir. Bununla belə, Andersson hədəfə çatmaq üçün vaxta ehtiyac olduğunu da söyləyib. O qeyd edib ki, Azərbaycan futbolunda adlar çoxdur və birinci növbədə onları tanımalıdır.

Qeyd edək ki, "Neftçi" ötən ay Y.Anderssonla 2 illik müqavilə imzalayıb. O, Azərbaycana gələnə qədər öıkəsində AİK-in idman direktoru vəzifəsində çalışıb. Andersson "Hayduk" (Xorvatiya), "Arxus" (Danimarka) və İsveç millilərində də çalışıb.

Onun dediyinə görə, Avropada qazandığı təcrübəni Azərbaycanda da tətbiq etməyə çalışacaq: "Artıq "Neftçi"nin oyunlarına baxmışam. "Neftçi" rəhbərliyi ilə ilk görüşdən sonra məndə klubun layihəsinə maraq yarandı. Bu iş mənim üçün yeni çağırışdır".