PFL “İrəvan”da baş verənləri araşdıracaq

Peşəkar Futbol Liqası I Liqada yarışan “İrəvan”da yaşanan xoşagəlməz hallarla bağlı araşdırma aparacaq.

Futbolxeber.az saytına açıqlamasında bu barədə PFL prezidenti Elxan Səmədov deyib.

O bildirib ki, artıq bu gündən araşdırmalara start veriləcək: “Biz də klubda yaşananlardan mətbuat vasitəsi ilə xəbər tutduq. Bu barədə artıq bu gündən araşdırma aparılacaq. Bizim üçün də baş verənlər çox maraqlıdır”.

Elxan Səmədov qeyd edib ki, indiki halda PFL klubun daxili işinə müdaxilə edə bilməz: “Hazırda biz bu məsələyə birbaşa müdaxil edə bilmərik. Amma dediyim kimi, araşdırma aparacağıq. Əsasnaməyə əsasən oyunçular 1 oyunda meydana çıxmasalar, bu, texniki məğlubiyyətdir. Eyni hal ikinci dəfə yaşananda isə komanda çempionatdan uzaqlaşdırılacaq”.

E.Səmədov “İrəvan”da yaşananların Azərbaycan futbolunun imicinə zərbə olduğunu söyləyib: “Bu, futbolumuz üçün mənfi haldır. Heç birimiz bu cür halların yaşanmasını istəmərik. Belə məqamlar Azərbaycan futbolunu imicinə zərbədir”.

O, klubun gələcək perspektivi barədə sualı belə cavablandırıb: “İnanıram ki, müsbət nəsə olacaq. Çünki klub belə dağıla bilməz”.

Xatırladaq ki, “İrəvan”ın hücumçusu Mirsahib Abbasov dünən Sport24.az saytına müsahibəsində dörd aydır maaşsız oynadıqlarını, məşq formalarının olmaması və digər neqativ halları açıqlayıb və bildirib ki, futbolçular məşqləri və oyunları boykot edəcəklər.

Fərəc ASLANOV