Elşad Nəsirov: “Penalti olmasaydı, millimiz uduzmayacaqdı”

“Avstriya millisi stabil olaraq Avropa və dünya çempionatlarında çıxış edir. Buna baxmayaraq, millimiz güclü rəqibə qarşı yaxşı oyun sərgilədi”.

Futbolxeber.az saytına açıqlamasında bu sözləri AFFA-nın vitse-prezidenti Elşad Nəsirov millimizin AVRO-2024-ün seçmə mərhələsində Bakıda Avstriyaya 0:1 hesabı ilə uduzduğu oyun barədə danışarkən deyib.

Assosiasiya rəsmisi matçın taleyini penaltinin həll etdiyini təəssüflə qeyd edib: “Hiss olunurdu ki, komandamızda özünəinam var. Estoniya üzərində qələbədən sonra futbolçular bu matçda da uğur qazanmaq istəyirdilər. Təəssüf ki, ani diqqətsizlik buna imkan vermədi. Penalti olmasaydı, millimiz Avstriyaya uduzmayacaqdı”.

E.Nəsirov seçmə mərhələsinin sonunda müqaviləsi başa çatacaq millimizin baş məşqçisi Canni de Byaznin gələcək taleyi barədə sualı belə cavablandırıb: “Seçmə mərhələnin sonuna 2 tur qalıb. İndidən de Byazinin yığmada qalıb-qalmayacağı barədə danışmaq üçün tezdir. Bilirsiz, məşqçi dəyişmək uğura təminat vermir. Bəzən müxtəlif fikirlər səslənir. Amma unutmayaq ki, milli və klub məşqçilərinin işi tam fərqlidir. Çünki klubda baş məşqçi istədiyi futbolçunu sərəncamında görə bilər. Amma yığmada çalışanların belə bir imkanı olmur. Sən yalnız əlindəki futbolçularla işləməlisən”.

Fərəc ASLANOV