Ranqnik: "Azərbaycan millisi yaxşı müdafiə olunurdu"

"Asan oyun olmadı. Bura hazır gəlmişdik. Azərbaycanın hansı oyuna qadir olduğunu bilirdik, son iki matçlarına baxmışdıq. Asan olmasa da, konsentrasiya olmuşduq ki, qalib gələk. Buna da nail olduq".

Futbolxeber.az saytının məlumatına görə, bu sözləri Avstriya millisinin baş məşqçisi Ralf Ranqnik Avro-2024-ün seçmə mərhələsində Bakıda Azərbaycan millisinə qalib gəldikləri oyundan (1:0) sonra mətbuat konfransında deyib.

Almaniyalı mütəxəssis matçın sonuna yaxın futbolçular arasında baş verən insidentlə bağlı da danışıb: "Əgər davanı nəzərə alırsızsa, bu, futboldur, hər vəziyyət ola bilər. Dava da həmçinin. Sona 10 dəqiqə qalmış Saşa sifətinə zərbə almışdı. Bilərəkdən nəsə etmədi. Meydanda hər şey ola bilər. Futbolçular bir-birini söyə də, itələyə də bilərlər. Fransa, İspaniya, Belçika ilə görüşlərdə də hətta bir-birini söyürdülər. İrəli addım atmaq üçün hər üsuldan istifadə etməliyik. Təsnifat mərhələləri çətin olduğu üçün oyunçular özlərindən çıxırlar".

Ranqnik Avropa Liqasının qrup mərhələsində "Qarabağ"la Almaniyanın "Bayer" klubu arasında keçiriləcək görüş haqda da fikir bildirib: "Hazırda başqa oyundayıq. "Qarabağ"la maraqlanırıq, məlumatımız var. "Bayer" indi yaxşı formadadır, Bundesliqada yaxşı nəticələr əldə edirlər. Xal alacaqlar ya yox, bunu vaxt göstərəcək. Yığma ilə bağlı sual varsa, verə bilərsiz. Avstriyada da Azərbaycan klubları izlənilir, "Qarabağ"da tanınır".

Baş məşqçi ilk hissədə çətinlik çəkdiklərini qeyd edib: "Birinci hissədə çalışdıq ki, erkən qol vuraq, amma alınmadı. Azərbaycan yaxşı müdafiə olunurdu. Səhvlər edirdik, toparlana bilmirdik. İkinci hissə başlayanda oyunçulara dedim ki, toparlanmaq və ən azı bir qol vurmaq lazımdır. Başlayan kimi qol vurduq. Amma rahatlaşmalı deyilik. İkinci yarıda yenə səhvlər edirdik".