Tamaş: “Qarabağ” praktiki olaraq məqsədinə çatdı”

“Neftçi”nin macarıstanlı futbolçusu Mark Tamaş ölkəsinin nemzetisport.hu saytına açıqlama verib.

Futbolxeber.az saytının məlumatına görə, 30 yaşlı müdafiəçi Azərbaycan Premyer Liqasının 9-cu turunda "Qarabağ"a uduzmaqları (0:2) haqda danışıb:

“Qarabağ" praktiki olaraq məqsədinə çatdı, 2 qol vurdu. Nə olursa-olsun, optimistəm. Çünki hələ mövsümün başlanğıcındayıq. Əvvəlki çempionat matçlarındakı kimi, bu dəfə də kifayət qədər qol şanslarımız oldu. Təəssüf ki, yenə imkanları dəyərləndirə bilmədik. Bəzən qapı dirəyinə zərbə vururuq, bəzən rəqibin qapıçısı belə topu necə qaytaracağını bilmir. Hücumçularımız effektli olsalar, turnir cədvəlində yuxarı pillələrə qalxmağa başlayarıq. Zərbələri qola çevirməməyimizin səbəbi ustalıq problemi və ya konsentrasiyanın olmaması deyil. Sadəcə, uğursuzluq zolağındayıq. Yenə də üzərimizdə çox çalışmağımız öz bəhrəsini verəcək. “Səbail”lə növbəti turun oyununda uğurlu seriyaya başlayacağımıza inanıram. Artıq həftələrdir bu problemlə mübarizə aparırıq. Yaranmış vəziyyət bizi hədsiz dərəcədə əsəbiləşdirir".

Tamaş komandanın baş məşqçisi Adrian Mutunun ona güvəndiyini vurğulayıb: “Əvvəlcə Konfrans Liqasında, ardından isə çempionatda oynamaq şansı qazandım. Buna görə çox şadam. Son 3-4 görüşdə özümü gözlədiyim formada hiss etdim. Baş məşqçimiz Adrian Mutu mənə güvənir. Xoşbəxtlikdən klub rəhbərliyi də ona inanır. O, keçmiş zamanı məşhur hücumçusudur. Şübhəsiz ki, bizi daha effektli etməyin yolunu tapacaq. Bəlkə də hücumçularımız özünəinam hissi qazanmaq üçün məşqdə boş qapıya zərbələr vurmalı olacaqlar”.

O, sonda Macarıstan millisinə dəvət almamasında da toxunub: “Yığmamız son vaxtlar sabit və uğurlu futbol göstərir. Təxmin etmişdim ki, milliyə əvət almayacağam. Yenə də adlar oxunanda insan öz adının səslənəcəyini gözləyir. Mənim yeganə vəzifəm yaxşı futbol oynamaq və əlimdən gələni etməkdir. Təslim olmayacağam. İndi məqsədim noyabr ayına hazır olmaqdır”.

Qeyd edək ki, Mark Tamaş bu mövsümün əvvəlində “Neftçi” ilə 2 illik müqavilə imzalayıb. Onun komandası hazırda 12 xalla turnir cədvəlinin 5-ci pilləsində qərarlaşır.