“Tovuzdakı qələbə "Neftçi"nin özünə gəlməsi baxımından göstərici deyil”

Millimizin sabiq üzvü, futbol mütəxəssisi Aslan Kərimov Futbolxeber.az saytına müsahibəsi

- Azərbaycan Premyer Liqasının VIII turunda son çempion “Qarabağ” “Sumqayıt” üzərində böyükhesablı qələbə qazandı. Ağdam klubunun “Hekken”lə oyunöncəsi bu cür qələbə qazanacağını gözləyirdiniz?

- "Qarabağ"ın qələbə qazanacağı gözlənilən idi. "Qarabağ" bu matçdan 5-6 gün sonra Avropa Liqasında meydana çıxacaq. Bu da onu göstərir ki, "Qarabağ" İsveçdə oynayacağı tam heyəti meydana buraxdı. Tam heyətlə oynadıqları üçün "Sumqayıt"a qalib gələcəkləri gözlənilən idi. Düzü, belə böyük hesab olacağına inanmırdım. Amma onu da unutmayaq ki, Avropa Liqasında çıxış etdiyi heyət çox güclüdür. "Sumqayıt" psixoloji olaraq erkən qolların basqısından çıxa bilmədi. Nəticədə belə böyükhesablı məğlubiyyət alındı.

- Juninyo artıq 5 qolla Premyer Liqanın bombardiridi. Demək olar ki, “Qarabağ” axtardığı hücumçunu tapıb?

- Deməzdim ki, Juninyo “Qarabağ”ın istədiyi hücumçudur. Düzdür, onun qol duyumu var. Lakin ötən ilə baxanda görürük ki, Musa Qurbanlı da ölkə çempionatında kifayət qədər qol vurub. Bilmək olmaz, Juninyo Musa qədər qol vuracaq, ya yox. Belə bir heyətdə çıxış edirsənsə, Zubir, Andrade, Yankoviç kimi oyunçular səni topla təmin edəcəklər və öz növbəndə sən də Azərbaycan çempionatında qollar vuracaqsan. Lakin Avropa Liqasında bu qollarımn ardının gəlib-gəlməyəcəyi sual altındadır. Bunu qarşıdakı matçlarda görəcəyik. Odur ki, Azərbaycan Premyer Liqasında 5 qol vurmaq "Qarabağ"ın axtardığı hücumçuyam" mənasına gəlmir. Bunu demək olduqca tezdir.

- “Neftçi” çətin Tovuz səfərindən 3 xalla qayıtdı. “Ağ-qaralar”ın artıq özünə gəldiyini söyləmək mümkündür?

- Düzdür, "Neftçi" səfərdən qalib qayıtdı. Amma komanda çox gec özünə gəlib. "Turan Tovuz" üzərindəki qələbə "Neftçi"nin özünə gəlməsi demək deyil. Bu, sadəcə növbəti oyunlar üçün motivasiyadır.  Çempionluq uğrunda mübarizə, "Qarabağ"la rəqabət aparmaq “Neftçi” üçün çətin olacaq. Çünki mövsümün startında Mutunun komandası çoxsaylı xallar itirdi. "Neftçi"də ən böyük problem hücumçu yoxluğudur. Düzdür, 2-ci hissədə meydana daxil olan Olanare fərqləndi. Amma çempionat 1 oyundan ibarət deyil. "Neftçi" bundan əvvəlki oyunlarda fərqlənməkdə çətinlik çəkirdi, oyunçularının fərqlənmək üçün keyfiyyəti çatmırdı. Bu amil onları hazırkı vəziyyətə gətirib çıxardı. "Turan Tovuz" üzərində qələbə "Neftçi"nin özünə gəlməsi baxımından bir göstərici olmalı deyil. "Qarabağ", "Sabah" üzərində qələbə qazansalar, onda nəsə demək olar. Əks halda işləri çox çətin olacaq.

- “Kəpəz” evdə ardıcıl dördüncü məğlubiyyətini aldı. Gəncə klubunun Tərlan Əhmədovu göndərməklə səhvə yol verdiyini və indi həmin səhvin əziyyətini çəkməsi fikri ilə razısız?

- Autsayderlərin qrupunu nəzər salsaq görərik ki, bu mövsüm istənilən komanda digərinə qalib gələ bilir. "Qarabağ" əsas heyəti ilə oynamasa, autsayder komandaya məğlub ola bilər. Bu da çempionatın maraqlı keçdiyinə işarədir. Tərlan Əhmədovu göndərməklə səhv, ya düz etdilər, bu barədə nəsə deyə bilmərəm. Tərlan Əhmədovun qarşısına komanda tərəfindən qoyulan məqsəddən, şərtlərdən, verilən sözlərdən məlumatlı deyiləm. Hazırda "Kəpəz" bəzi oyunlarda özünü yaxşı göstərə bilir. Xüsusilə liderlərlə oyunda səhv addım atmadıqları görünür. Komanda sübut edir ki, güclü rəqibə qarşı da oynaya bilər. Son oyunlarda göstərdikləri performans qol vurmaq baxımından axsadıqlarını göstərir. Bu, bir psixoloji baryerdir. Bəlkə də bu hal büdcə ilə əlaqədardır. Düşünürəm ki, digər komandalarla rəqabət aparmaq baxımından “Kəpəz” üçün çətin olacaq. "Səbail" və "Qəbələ", debütant "Araz-Naxçıvan" özlərini yaxşı tərəfdən göstərməyə başlayıblar. Naxçıvan təmsilçisi artıq avrokuboklar uğrunda mübarizə aparır. "Kəpəz"in bu rəqiblərlə mübarizə aparacağı çətin görünür. Komanda qış fasiləsində oyunçu transferi baxımından fikirləşməlidir. Əks halda bu mövsümki çempionatda uğur qazanmaq üçün Gəncə təmsilçisi üçün çox çətin olacaq.

- “Səbail” - “Sabah”: Sizcə, bu oyunda kim 2 xal itirdi, kim 1 xal qazandı?

- “Səbail” son turlardakı çıxışına görə xoş sözlərə layiqdir. Şahin Diniyevin komandası həm gözəl oyun sərgiləyir, həm də nəticə qazanır. Performansına görə həm “Səbail”, həm də “Sabah” xal qazanmağa layiq idi. Amma nəzərə almaq lazımdır ki, “Səbail”in bir qolu ofsayda görə sayılmadı. Mənimçün həmin qərar qaranlıq qaldı. “Səbail”in qolunda ofsaydı hansı xətlə, hansı rakursdan çəkdilər, anlamadım. Mənə elə gəlir ki, ofsayd deyil, qola bənzəyir. İstənilən halda heç-heçəni ədalətli nəticə saymaq mümkündür. Hər iki komanda fərqlənmək üçün kifayət qədər şanslar əldə etdilər. “Səbail” son dəqiqələrdə qapısında qol görsə də, ruhdan düşmədi, əzmkarlıq nümayiş etdirərək hesabı bərabərləşdirə bildi. Cari mövsümə uğursuz start versə də, turlar keçdikcə komanda özünə gəlib. Şahin Diniyev bacarıqlı ifaçılardan əla kollektiv formalaşdırıb.

- "Araz-Naxçıvan"dan debütant olaraq belə başlanğıc gözləyirdiniz?

- Debütant komandaların sponsorları, maliyyə ayıran şəxs və qurumlar məşqçilərinə legioner almağa imkan versə, şərait yaratsa, istənilən komanda "Araz-Naxçıvan" səviyyəsində çıxış edə bilər. Naxçıvan təmsilçisinin oyun üslubu, əzmkarlığını əskiltmək istəmirəm. Komandanın özünəxas oyun üslubu var. Büdcələri də kifayət qədər yaxşıdır. Onların transfer etdikləri oyunçulara əsasən komandanın axırıncı yerdə olacağını demək olmazdı. Əslində bu da oldu. Yaxşı oyunçular transfer olunmasaydı, nəticə yəqin ki, fərqli olardı. Görünən odur ki, seleksiya siyasəti komandada yaxşı qurulub. Transfer məsələsinə kimlər nəzarət edir deyə bilmərəm. Azərbaycan çempionatına uyğun oyunçulara malikdirlər. Heç bir komandadan çəkinmədən mübarizə aparırlar. "Qarabağ"a son dəqiqələrdə məğlub olmaqları təsadüfi hal idi. Hücumameyilli oyun nümayiş etdirirlər. Turnir cədvəlindəki mövqeləri komandanın oyun üslubunu əks etdirir. Yalnız müdafiədə oturmaqla, bəxt sayəsində gəlib bu yerə çıxmayıblar.

Azad NURİYEV