Şahin Diniyev: "Ofsayddan söhbət gedə bilməzdi"

"Çox maraqlı oyun alındı. Qarşılılqı hücumlar şəraitində keçən matç oldu. İlk yarıda sanki sıxıldıq".

Futbolxeber.az saytının məlumatına görə, bu sözləri "Səbail"in baş məşqçisi Şahin Diniyev Azərbaycan Premyer Liqasının 8-ci turunda "Sabah"la 2:2 hesablı heç-heçə etdikləri oyundan sonra təşkil olunan mətbuat konfransında deyib.

O, ilk hissədə çətinlik çəkdiklərini, 2-ci hissədə daha yaxşı oynadıqlarını bildirib: "Hücuma çıxmaqda çətinlik çəkirdik, top bizdə qalmırdı. Ancaq ikinci yarıda başqa komanda olduq, başqa futbol oynadıq. Məni ən əsas komandanın xarakter göstərməsi, savadlı oynaması sevindirir. Oyun varsa, nəticə gələcək. Futbolçularıma təşəkkür edirəm. Hamı bir-biri üçün vuruşdu. Əvəzetmədən meydana girənlər ritmdən düşmədilər. Bəlkə də biz bu gün xal itirdik, qazanmadıq. Amma oyun baxımından qazandıq. Hər futbolçu artırır. Bu, məni sevindirir".

"Sabah"ın baş məşqçisi Murad Musayev oyun barədə danışarkən "Səbail"in ləğv olunan qolu haqda fikirlər söyləyib və həmin epizodda oyundankənar vəziyyətin olduğun deyib. Ş.Diniyev isə VAR hakiminin səhv qərar verdiyini qeyd edib: "Mənə telefonda göstərdilər, ofsayddan söhbət gedə bilməzdi. Xətt ötürmədən sonra çəkilmişdi".

Mütəxəssis futbolçusu David Qomisin sonradan meydana daxil olmasının səbəbini də açıqlayıb: "Qomis 30-35 dəqiqə oynamağa hazır idi. Son matçda zədələnmişdi. İki gün idi ki, məşq edirdi. Ya əvvəldən oynamalı idi, ya da sonradan qoşulmalı idi. Düşündüm ki, sonradan daha efefktiv olacaq".

Diniyev "Çox məyus olmusunuz" sualına belə cavab verib: "Uşaqların əziyyətinə heyfim gəlir. Onlar sona qədər vuruşdular".

Mütəxəssis Murad Musayevlə arasındakı dialoqdan da danışıb: "Biz həmkarıq. Heç vaxt bir-birimiz haqda fikir bildirməməliyik. Murad Musayev futbolla yaşayır. Belə insanları sevirəm. Oyunun içindədir. Hakimlərə təzyiq bəzən olur. "Barselona" bu gün hakimlərə təzyiq üzrə məşq keçir. Bu da futbolun bir hissəsidir. Murad Musayevin gedişlərinə hörmət edirəm. Sevinirəm ki, futbolun içində olanlardandır. Mən də balanslaşdırmaq istəyirdim".

O, "Bu gün Murad Musayevlə yarışa girmişdiniz, təzyiq edirdiniz" fikrinə münasibət bildirib: "Özü də rusca deyirdim".

Mütəxəssis "Bu gün "Sabah"la heç-heçə etdiniz, yoxsa hakim sizi qələbədən etdi" sualına cavab verərkən yalnız VAR hakiminin qərarından narazı qaldığını bildirib: "Hakimlik bir şey yoxdu. İdeal hakimlik etdi. Sadəcə bir epizod var idi. Ola bilər ki, VAR-ın günahı var. Çox vacib qol idi. Bilirdim ki, "Sabah" irəli gedəcəkdi, biz 3-cünü vurardıq".