Seymur Rəhimov: “Qarabağ”a qarşı hansı heyətlə oynayırsan oyna, yenə də çətin olacaq”

“Oyun haqqında danışılası çox söz yoxdu. “Qarabağ”ı təbrik edirəm. Avroliqa oyunlarında komandaya uğurlar arzulayıram”.

Futbolxeber.az saytının məlumatına görə, bu sözləri “Sumqayıt”ın məşqçisi Seymur Rəhimov Azərbaycan Premyer Liqasının 8-ci turunda səfərdə “Qarabağ”a uduzduqları oyundan sonra deyib.

O, 0:5 hesablı yenilgini belə şərh edib: “Rəqibin gücünü bilirdik. “Qarabağ” Avropada adından söz etdirən komandadır. Uşaqlar bu gün əllərindən gələni etdilər. Lakin səviyyə fərqi özünü göstərdi”.

Mütəxəssis komandadakı səhvləri qeyd edib: “Təbii ki, bu cür uduzacağımızı gözləmirdik. Səhvlərimiz oldu. Onların üzərində işləyəcəyik. “Qarabağ”a qarşı hansı heyətlə oynayırsan oyna, yenə də çətin olacaq”.

S.Rəhimov qapıda dəyişiklik etməmələri barədə sualı belə cavablandırıb: “Vaxtı çatanda Orxan Sadıqlı da şans qazanacaq”.

“Sumqayıt”ın məşqçisi gələcəyi nikbin baxdıqlarını vurğulayıb: “Bu oyunu yaddan çıxarıb, növbəti matçlara hazrlaşmalıyıq. Bu gün ikinci hissədə bəzi hücumlarımız oldu. Az da olsa bu məqam gələcək oyunlara nikbin baxmağa əsas verir”.