Elmar Baxşıyev statistikaya əhəmiyyət vermir: “Keçən mövsüm geridə qalıb, indi...”

“Qəbələdə hazırlıqlarımız davam edir. Yeni transferimiz Samuel Tetteh də artıq bizimlədir. O, komandanın dünənki məşqində iştirak edib”.

Futbolxeber.az saytına müsahibəsində bu sözləri “Qəbələ”nin baş məşqçisi Elmar Baxşıyev deyib.

Mütəxəssis qanalı forvardın Azərbaycan Premyer Liqasının altıncı turunda səfərdə “Turan Tovuz”la matçda “Qəbələ”nin heyətində debüt etməsinin mümkün olduğunu bildirib: “Tettehin durumu qarşıdakı günlərdə məlum olacaq. Dünən bərpa məşqi keçib. Hazırlığı qaydasında olsa, Tovuzdakı matçda şans qazanacaq”.

O, qarşıdakı görüşə tam heyətlə hazırlaşa bilmədiklərini söyləyib: “Hazırda 2 futbolçumuz düşərgədə deyil. Emil Səfərov əsas millinin, Mehrac Baxşalı isə U-21-in düşərgəsindədir. Qalan bütün oyunçular məşqlərdə iştirak edirlər”.

E.Baxşıyev sentyabrın 17-də səfərdə “Turan Tovuz”la matçda qələbəyə kökləndiklərini bildirib: “Hər oyuna 3 xal üçün çıxırıq. Təbii ki, “Turan Tovuz”la oyun da istisna olmayacaq. İstəyirik ki, ötən tur qazandığımız qələbənin ardını gətirək”.

Ötən mövsüm Tovuzda keçirilən oyunlarda “Qəbələ” 4 xal toplayıb. Lakin Elmar Baxşıyev statistikaya fikir vermədiyini bildirib: “Keçən mövsüm geridə qalıb. İndi hər oyuna maksimum köklənmək lazımdır ki, qələbəyə yaxınlaşasan”.