Aslan Kərimov: “Millinin nəticələri ürəkaçan olmadığı üçün azarkeşlər stadiona gəlmək istəmir”

“Millimiz yaxşı oyun nümayiş etdirdi. Belçika kimi komandaya qarşı oyunda qol imkanları yaratdıq. Rəqibə isə az imkan verdik. Kuryoz qol buraxsaq da, bu oyunda xal qazana bilərdik”.

Futbolxeber.az saytına müsahibəsində bu sözləri futbol mütəxəssisi Aslan Kərimov milli komandamızın Avro-2024-ün seçmə mərhələsində Belçikaya qarşı keçirilən oyununu (0:1) şərh edərkən deyib.

Yığmamızın sabiq üzvü Belçika ilə görüşdə bəxtimizin gətirmədiyini bildirib: “Belə oyunlarda ələ düşən fürsətləri dəyərləndirməlisən. Xallar qazanmaq üçün müdafiəni toxunulmaz saxlamaq məcburiyyətindəsən. Yalnız bu səviyyədə uğurlar qazanmaq olar. Azərbaycan millisi İspaniya deyil ki, 6-7 qol fürsəti yaradıb birini qola çevirsin. Belçika ilə oyunda yaxşı qol imkanlarımız olsa da, bəxtimiz gətirmədi”.

A.Kərimov millinin 6500 azarkeş tutumuna malik olan “Dalğa Arena”nı doldura bilməməsinin səbəbini belə izah edib: “Nəticələrimiz o qədər ürəkaçan olmadığı üçün azarkeşlər stadiona gəlmək istəmir. Bu, başadüşüləndir. Milli komandanın həmişə azarkeş dəstəyinə ehtiyacı var. Azarkeşlər çox olan oyunda milli komanda daha yaxşı performans göstərir. Oyunçular bu məsuliyyəti hiss edir. Belə bir hal olmadıqda onlar məyus olur. Səbəb yalnız oyunların nəticəsidir”.

Kərimov millinin formasını geyərkən Bakıda Belçika millisinə qarşı keçirdikləri görüşü yaxşı xatırladığını söyləyib: “Əlbəttə, həmin matçı yaxşı xatırlayıram. Bizim dövrümüzdə sonradan dünya reytinqinə başçılıq edəcək Belçika millisinin təməli yeni qoyulurdu. O dövrdə gənc oyunçuları var idi. Lukaku heç yox idi (gülür). İndi o, qocaman oyunçuya çevrilib. Həmin futbolçular sonrakı illərdə daha da inkişaf edərək dünyanın ən yaxşılarına, bir nömrəli komandasına çevrilə bildilər. Mənim dövrümdə qarşılaşdığımız Belçika perspektivli, gənc amma güclü olmayan milli komanda idi”.

Millimizdən fərqli olaraq, bu gün Moldova, Qazaxıstan kimi kollektivlər Avro-2024-ə vəsiqə uğrunda mübarizə aparırlar. Aslan Kərimov bu məqama da toxunub: “Moldovanın millimizdən irəli olması fikri ilə razı deyiləm. Moldova, Estoniya, Belarus kimi kollektivlər aşağı-yuxarı bizimləm eyni səviyyədədirlər. Qazaxıstan isə son illərdə daha yaxşı nəticə göstərməyə çalışır. Onların yaxşı performans göstərməsi, nəticə qazanması düşdükləri qrupla əlaqəlidir. Zamanında bizim də belə yaxşı nəticələr qazandığımız vəziyyətlər olub. Qrupda zəif, sənə uyğun komandarla düşəndə, nəticə də yaxşı olur. Azərbaycan millisinin qrupda 9 xal yığdığı vaxtlar olub. Milli komanda Robert Prosineçkinin vaxtında pis nəticələr əldə etməmişdi. Mənə elə gəlir ki, Qazaxıstanın oyunçuları daha yaxşı çempionatlarda çıxış edirlər. Düzdür, heyətdə yerli çempionatda, "Astana"da çıxış edən futbolçular da var. Ümumiyətlə futbol infrastrukturu olaraq Qazaxıstan Azərbaycandan öndədir. Stadionları daha çoxdur, futbolun inkişafına dəstək olurlar”.

Veteran yarımmüdafiəçi sabah millimizin İordaniyaya qarşı keçirəcəyi yoldaşlıq oyunundan da söz açıb: “Adi yoldaşlıq oyunudur. Düşünürəm ki, İordaniya millisi ilə oyun təcrübə baxımından, futbolçuların hazırlığı baxımından kömək ola bilər. İordaniya yığmasının hazırkı vəziyyətindən xəbərdar deyiləm. Rəqibi məğlub edə bilərik. Yəqin ki, de Byazi bu matçda Belçika ilə görüşdə ehtiyatda olan, gənc oyunçulara şans verəcək. Digər tərəfdən də bu cür matçlar gənc oyunçuların özünü göstərməsi üçün əsl platformadır”.

Azad NURİYEV