Cavid Hüseynov: “Qələbəyə layiq idik”

“Oyun həddindən artıq çətin keçdi. Çünki günorta saat 1-də oynamaq futbolçulara çox çətinlik yaratdı. 36-40 dərəcə istidə, özü də süni meydançada oynamaq hər iki komanda üçün çox çətin idi”.

Futbolxeber.az saytına müsahibəsində bu sözləri II Liqanın açılış oyununda “Füzuli”ni 4:3 hesabı ilə məğlub edən “Cəbrayıl”ın baş məşqçisi Cavid Hüseynov deyib.

O, əsas rəqiblərindən biri üzərində qələbə qazandıqlarını qeyd edib: “Rəqibin heyətində təcrübəli futbolçular var. Buna görə də oyunun ssenarisini təxmin edirdik. Komandam meydanda rəqibdən daha dözümlü olmalı idi. Düşünürəm ki, bugünkü qələbəyə layiq idik. Əsas rəqiblərimizdən birini məğlub etməyi bacardıq”.

Hüseynov hədəflərindən də söz açıb: “Günü-gündən inkişaf etmək istəyirik. Yanaşmamız tam peşəkardı. Hədəf yaxşı komanda formalaşdırmaqdı. Nəticələr olduqca hədəflərimiz də artacaq”.

O, “Cəbrayıl”a olan dəstəyə dı toxunub: “Cəbrayılda futbolçu çox sevirlər. Həm azarkeşlər, həm icra orqanları, həm də ağsaqqallardan komandamıza dəstək var. İnşallah bundan sonra da dəstək verərlər”.

Fərəc ASLANOV