Lebondan qələbə şərhi: “Əziyyət çəkməli olduq”

“Çətin oyun oldu. Gördüyünüz kimi, görüş ərzində cəmi bir dəfə fərqlənə bildik. "Sumqayıt" olduqca çətin rəqibdir”.

Futbolxeber.az saytına müsahibəsində bu sözləri “Neftçi”nin yarımmüdafiəçisi Kilan Lebon Azərbaycan Premyer Liqasının V turunda “Sumqayıt”ı 1:0 hesabı ilə məğlub etdikləri qarşılaşma barədə danışarkən deyib.

Fransız futbolçu ardıcıl iki qələbə qazanmalarının müsbət məqam olduğunu bildirib: “Mübarizə aparmalı, əziyyət çəkməli olduq. Ancaq hesab edirəm ki, görüşdə potensialımızı ortaya qoymağı bacardıq. Qələbə qazanmaq çox xoşdur. Ard-arda iki oyunu qələbə ilə başa vurmaq olduqca müsbət məqamdır”.  

O, növbəti turda "Araz-Naxçıvan"a qarşı keçirəcəkləri matçda da söz açıb: “Çətin oyun olacaq. Azərbaycan Premyer Liqasında  olduqca güclü komandalar var. Qələbə qazanmaq üçün meydana çıxacağıq. Ümumiyyətlə, hər matça 3 xal üçün çıxırıq, bütün görüşlərdə qalib gəlmək istəyirik. Milli komandaların oyunlarına görə istirahət edib növbəti oyuna hazırlaşmaq üçün çox vaxtımız var. Ümid edirəm ki, "Araz-Naxçıvan"a qalib gələ biləcəyik”.