“Qəbələ” - “Zirə”: 34-cü duel

Azərbaycan Premyer Liqasının V turunda “Qəbələ” bu gün öz meydanında “Zirə” ilə qarşılaşacaq.

Futbolxeber.az saytının məlumatına görə, Qəbələ şəhər stadionunda təşkil olunacaq matç iki komanda arasındakı 34-cü duel olacaq. İndiyədək rəqiblər 33 dəfə görüşüb. 13 qələbə qazanan “Qəbələ” 14 heç-heçə edib və 6 dəfə məğlub olub. Rəqib qapısına 45 qol vuran “qırmızı-qaralar” 29 top buraxıb. “Qəbələ”nin bu oyunlarda ən yaxşı bombardiri 4 qol vuran Aleksey Qaydır. Ülvi İsgəndərovun hesabında üç top var.

İndiyədək keçirilən 33 görüşdən 31-i çempionat, 2-si kubok çərçivəsində keçirilib. Premyer Liqada 11 dəfə qalib gələn “Qəbələ” 14 matçdan 1 xalla ayrılıb. Digər 6 matçda Bakı klubu qələbə qazanıb. Bu oyunlarda 38 qol vuran “qırmızı-qaralar” 27 top buraxıb.

“Qəbələ” 17-ci dəfə “Zirə”ni öz meydanında qəbul edəcək. 7 qələbəsi olan meydan sahibləri 8 sülhə imza atıb və yalnız 1 dəfə uduzub. Doğma divarlar arasında 22 qol vuran komanda 11 top buraxıb.

Xatırladaq ki, sentyabrın 2-də Qəbələ şəhər stadionunda keçiriləcək “Qəbələ” - “Zirə” matçı saat 18:00-da başlayacaq.