Сoşqun Diniyev: “Türkiyə çempionatı düşündüyümdən də ağırdı” (MÜSAHİBƏ)

Türkiyənin “Ümraniyespor” klubunda çıxış edən millimizin üzvü Coşqun Diniyevin Futbolxeber.az saytına müsahibəsi

- Artıq Türkiyə birinci liqasında debüt etmisən. İlk turda “Gənclərbirliyi”, ikinci turda isə “Göztəpə” ilə oyunlarda start heyətində meydana çıxdın. İlkin təəssüratların necədi?

- Ümumi çempionatla bağlı düşüncələrim pozitivdir. Təşkilatçılıq, mübarizə, maraq ən üst səviyyədədir. Ona görə də burada futbol oynamaq çox maraqlı və gözəldi.

- Çempionatın səviyyəsi gözlədiyin kimidi, yoxsa daha ağırdı?

- Bura gəlməmişdən öncə də çempionatı izləyirdim. Bilirdim ki, bu liqada fiziki futbol daha ön plandadı. Amma görürəm ki, Türkiyə çempionatı düşündüyümdən də ağırdı. 18 komandanın 15-16-sı çempionluğu hədəfləyir. Buna görə də hər oyunda qızğın mübarizə gedir.

- Şənbə günü keçirilən “Göztəpə” ilə matç ilk ev qarşılaşması idi. Doğma publika qarşısında debütun necə keçdi?

- Bəli, son turda doğma azarkeşlərimiz önündə oynadıq. Stadionda çox gözəl ab-hava var idi. Azarkeşlər komandaya inanılmaz dəstək verirdilər. O cür coşqunun qarşısında futbol oynamaq çox gözəldi. 90 dəqiqə boyu fanatların sevgisini, diqqətini hiss edirsən. Bütün bunlar da məsuliyyətimizi artırır. Düzdür, ilk ev oyununda qalib gələ bilmədik. Lakin növbəti matçlarda azarkeşlərimizi sevindirəcəyimizə inanıram.

- Son oyundan sonra futbolçuların qiymətləndirməsinə baxdım, sol cinah müdafiəçisindən sonra “Ümraniyespor”un heyətində ən yüksək bala sən layiq görülmüşdün. Öz oyunundan nə dərəcə razısan?

- Həqiqətən də oyundan sonra bununla bağlı çoxlu mesajlar aldım. Demək olar ki, hamı oyunum haqda müsbət fikirlər səsləndirdi. İstər azarkeşlər olsun, istər məşqçilər, istər rəhbərlik. Bu, motivasiyamı artırmaqla yanaşı, həm də əlavə məsuliyyətdi. İnşallah növbəti həftələr çempionata tam uyğunlaşdıqdan sonra komandama daha çox xeyir verəcəyimi düşünürəm. Məqsədim mənə olan inamı, etimadı doğrultmaqdı.

- Baş məşqçi Mustafa Er ilk 2 görüşdəki çıxışını necə qiymətləndirir?

- İlk turda gözləmədiyimiz məğlubiyyətlə üzləşdik. Buna görə də Mustafa hoca narazı idi. Lakin “Göztəpə”yə qarşı çox yaxşı, dominant futbol oynadıq. İzmir klubu bəlkə də çempionatın ən güclü heyətinə malikdi. Bununla belə, onlara qarşı çox gözəl mübarizə apardıq. Bu səbəbdən də baş məşqçi matçdan sonra razılığını ifadə etdi və hər birimizə təşəkkürünü bildirdi. Amma qələbə qazansaydıq, daha yaxşı olardı. Hər halda meydandan 1 yox, 3 xalla ayrılsaydıq, tam razı qalardı.

- Sənin kimi Bəxtiyar Həsənalızadə də Türkiyə birinci liqasında çıxış edir. Onunla əlaqən var?

- Bəxtiyarla bir-birimiz çoxdan tanıyırıq. Amma hələ ki, Türkiyədə görüşə bilməmişik. Görüşməyə, danışmağa vaxt olmayıb. Ona da uğurlar arzu edirəm. İnanıram ki, onun üçün də uğurlu mövsüm alınar.

İbrahim CƏFƏROV