“Zirə”nin liderliyini xüsusi qeyd etmək lazımdır, bu, təsadüfi deyil”

“Zirə”nin liderliyini xüsusi qeyd etmək lazımdır, bu, təsadüfi deyil”.

Futbolxeber.az saytına müsahibəsində bu sözləri milli komandamızın məşqçisi Arif Əsədov deyib.

Mütəxəssis Rəşad Sadıqovun komandasının oyunu ilə ilk “üçlüy”ə layiq olduğunu bildirib: “Komanda bir çox futbolçular transfer edib. Ötənilki heyətin əsasını saxlanılaraq, heyətdə müəyyən mövqelərdə gücləndirmə aparılıb. Bu baxımdan hazırda "Zirə"nin oyunu çempionatın ilk 3 pilləsi uğrunda mübarizə aparmağa imkan verir”.

O, sabiq klubu “Neftçi” barədə də danışıb: “Fikrimcə, "Neftçi" yavaş-yavaş özünə gəlməyə başlayır. Komandaya iki cəbhədə mübarizə aparmaq çox çətin idi. Hazırkı kollektivin fiziki durumu yaxşı deyildi. Dünənki oyun "Neftçi"nin özünə gəldiyini göstərir. Zaman keçdikcə daha yaxşı "Neftçi" görəcəyik. Bu il "Neftçi" çempionluq uğrunda mübarizə aparan komandalardan biri olacaq”.

A.Əsədov hazırda Premyer Liqada xal itirməyən iki komandadan biri olan “Sumqayıt”dan da söz açıb: "Sumqayıt"ın bu cür irəliəməsi xoş bir sürprizdir. Görünür, baş məşqçi komandanı yavaş-yavaş qurub və onun nəticəsində komandaya yaxşı start verə bilib. Bəzi komandalar var ki, başları avrokuboklara qarışıb. Bu, getdikcə çətinləşəcək. "Sumqayıt"ın hazırda yığdığı xallar növbəti turlarda strateji yerlər uğrunda kömək olacaq”.

Millimizin məşqçisi mövsümə uğursuz start verən “Səbail”in zaman ehtiyac duyduğunu vurğulayıb: “Səbail”dən gözlənilməz start oldu. Yeni transferlər ediblər. Bu baxımdan oyun planı üzrə komanda hələ ki öz performansını tam tuta bilməyib. "Qəbələ" kimi "Səbail"in də bir qələbəyə ehtiyacı var. Bir qələbə qazandıqdan sonra bu əhval-ruhiyyə altında öz xallarını toplayacaqlar”.

Azad NURİYEV