AFFA (y)atır, hakimlər batır - REPLİKA

Azərbaycan Premyer Liqasının üçüncü turu hakim biabırçılıqları ilə yadda qaldı. Son oyun günündə ardıcıl 2 matçda futbol adına rəzalət yaşandı.

Əvvəlcə Suraxanıda “Qarabağ” - “Araz-Naxçıvan” matçını idarə edən Nicat İsmayıllı “oyun çıxardı”. Belə ki, birinci hissənin sonlarına yaxın “Qarabağ”ın müdafiəçisi Rahil Məmmədov rəqib hücumçu Elvis Maşikeyə qarşı cərimə meydançasının daxilində kobud oynadı. Maşikenin yerdə qaldığı epizodda penalti olduğu hətta “Media sektor”dan da görünürdü. Nicat İsmayıllının fitinin susmasını bəlkə də hardasa başa düşmək olar. Ola bilər epizodu dəqiq görməyib, yaxud gənc olduğu üçün əmin olmadan fitini səsləndirmək istəməyib. Bəs VAR? Futbolu həvəskar səviyyədə bilən jurnalistlərin bircə dəfə təkrarına baxdıqdan sonra birağızdan 100 faizlik penalti kimi dəyərləndirdiyi epizodu VAR-da oturan Tural Qurbanovla Vüsal Məmmədov necə görməyə bilər? Baş hakimin penalti təyin etməməsi bir ayıbdısa, VAR-ın bu epizoda reaksiya verməməsi ikinci ayıbdı...

“Qarabağ” - “Araz-Naxçıvan” qarşılaşmasındakı ikinci mübahisəli penalti epizodu matçın sonlarında yaşandı. Cərimə meydançasının daxilində top “Araz-Naxçıvan”ın yarımmüdafiəçisi Kadiri Mohammedin əlinə dəysə də, referinin fiti yenə də susdu. İlk hissədə olduğu kimi, bu dəfə də VAR-dan hər hansı səs-soraq çıxmadı. Halbuki topun ələ dəydiyi aşkar görünürdü. Hətta hər zaman səbrli, təmkinli olmağı ilə seçilən Qurban Qurbanov belə bu epizoda əllərini havaya qaldırmaqla etiraz etdi. Ümumiyyətlə, kənardan belə təəssürat yaranırdı ki, sanki Suraxanıdakı matçda VAR yoxdu. İki aşkar penalti epizoduna VAR-dan reaksiya gəlməməsi məhz belə düşünməyə əsas verir.

Növbəti hakim fiaskosu Masazırda yaşandı. Bəlkə də Nicat İsmayıllının səhvlərini gəncliyinə, təcrübəsizliyinə bağlamaq olar. Amma “Sabah” - “Neftçi” qarşılaşmasındakı rəzalətin “müəllifi” Əliyar Ağayev ölkənin 1 nömrəli hakimidi. Lakin dünənki səhvləri nə onun adına, nə də təcrübəsinə yaraşdı. Çünki oyunun ən qalmaqallı epizodunda Ağayevin hər iki vərəqə qərarı yanlış idi. Əvvəla, Murad Musayevə o epizodda qırmızı yox, sarı vərəqə düşürdü. Normalda adi vəziyyətdə “Sabah”ın baş məşqçisinin hərəkətinə vərəqə düşmür. O qədər meydanın kənarda məşqçilərin topa toxunuşuna şahidlik etmişik ki. Musayevin vəziyyətində ona görə sarı vərəqədi ki, o, “Neftçi”nin futbolçusu aut atmağa hazırlaşarkən topa toxundu. Amin Seyidovun hərəkəti isə 100-də 100 qırmızı vərəqədi. O epizodda heç mübahisə etməyə belə dəyməz. Görəsən, Əliyar Ağayev Murad Musayevə qırmızı, Amin Seydiyevə isə sarı vərəqə göstərməsini hansı məntiqlə izah edəcək? Bunu izah etmək mümkün də deyil!

Bir sözlə, dünən Azərbaycan futbolu, Azərbaycan Premyer Liqası, Azərbaycan hakimliyi adına növbəti rəzalət yaşandı. Günahın bir qismi də AFFA Hakimlər Komitəsindədi. Normal hazırlıq keçməyən hakimlərdən necə yüksək idarəçilik gözləmək olar? Yay fasiləsində AFFA-nın hakimləri xarici ölkələrdən birinə təlim-məşq toplanışına göndərəcəyi bildirilirdi. 3 fərqli ölkənin hazırlıq üçün adı çəkilsə də, sonradan toplanışda səs-soraq çıxmadı. Hakimləri aldadan, onların hazırlıq prosesinə zərbə vuran AFFA gözdən pərdən asmaq üçün ədalət qoruyucularını seminarla “yola verdi”. Təbii ki, seminar təlim-məşq toplanışının yerini verə bilməz. Bir anlıq düşünün: hansısa Premyer Liqa klubumuz yay fasiləsində hazırlıq üçün toplanışa getmir, əvəzində oteldə yığışıb seminarla kifayətlənir. Bu halda həmin komandanın vəziyyəti necə olar?

Ümumiyyətlə, son vaxtlar bir çox vacib məsələlərlə bağlı AFFA-da axsamalar hiss olunur. Bu isə baş katib Sərxan Hacıyevin adı ilə əlaqələndirilir. Deyilənlərə görə, AFFA-nın prezidenti Rövnəq Abdullayev Sərxan Hacıyevi ciddi fiqur kimi qəbul etmir. Məhz bu səbəbdəndir ki, bir çox məsələləri S.Hacıyev həll etməkdə çətinlik çəkir. Hacıyevin səriştəsizliyinin əziyyətini isə indiki halda hakimlər çəkir...

İbrahim CƏFƏROV