“Neftçi”nin qapıçısı debütunu “Futbolxeber"ə şərh etdi: “Ağır oyun oldu”

“Mənim üçün çox ağır oyun oldu”.

Futbolxeber.az saytına açıqlamasında bunu “Neftçi”nin qapıçısı Rza Cəfərov Azərbaycan Premyer Liqasındakı debütunu şərh edərkən deyib.

Dünən III tur çərçivəsində “Sabah”a qarşı keçirilən matçda start heyətində yer alan gənc qapıçı məşqçilər korpusunun ona dəstək olduğunu bildirib:

“Məşqçilər korpusunun üzərimdə əziyyəti böyükdü. Hamısı mənə dəstək oldu. Həftə boyu oyuna hazırlaşmağımda çox kömək oldular. Mən də özümü yaxşı tərəfdən göstərməyə çalışdım. Əlimdən gələni etdim ki, mənə bəslənən ümidləri puç etməyim. İnanıram ki, ümidləri doğrultdum”.

R.Cəfərov daha da irəli getmək üçün əlindən gələni edəcəyini vurğulayıb: “Bu, ilk oyunum idi. Çalışacam ki, daha da artırım, inkişaf edim. Adrian Mutunun matçdan sonra haqqımda müsbət fikirlər səsləndirməsi məni sevindirir. Mən də çalışacam ki, hər zaman komandama faydalı olum”.

Fərəc ASLANOV