Andre Şinyaşiki: "Birinci hissədə komanda olaraq "Beşiktaş"dan çəkinirdik"

“Mənim üçün “Beşiktaş”la oyun xüsusi əhəmiyyət kəsb edirdi. Çünki ilk dəfə idi ki, “Neftçi”nin start heyətində yer alırdım və azarkeşlərimizin önündə oynayırdıq”.

Futbolxeber.az saytının məlumatına görə, bunu “Neftçi”nin hücumçusu Andre Şinyaşiki UEFA Konfrans Liqasında “Beşiktaş”a 1:3 hesabı ilə uduzduqları oyunu şərh edərkən deyib.

O, ikinci hissədə daha yaxşı oynadıqlarını vurğulayıb: “İlk hissədə rəqibdən komanda olaraq bir qədər çəkinirdik. “Beşiktaş” güclü komandadı. Lakin rəqibin kimliyindən asılı olmayaraq qorxmadan mübarizə aparmaq lazımdı. İkinci yarıda bunu etdik. Nəticədə də daha yaxşı oyun sərgilədik”.

O bildirib ki, sona yaxın birdən daha çox qol vura bilərdilər: “Bəxtimiz gətirmədi. Daha çox qol vura bilərdik. Ancaq bəxtdən də əlavə unutmaq olmaz ki, yeni komandayıq. Bir-birimizə daha da yaxşı uyğunlaşmalıyıq ki, yaxaladığımız epizodları dəyərləndirək”.

Fərəc ASLANOV