Elnur Cəfərov: “Mənə motivasiya verən “Xəzər Lənkəran”, “Neftçi” yox, “Kəpəz” idi”

“Kəpəz”in yarımmüdafiəçisi Elnur Cəfərov Futbolxeber.az saytına müsahibə verib.

- İlk turda “Neftçi”yə qarşı keçirilən oyunda uzun fasilədən sonra Azərbaycan Premyer Liqasına qayıdışın baş tutdu. Təəssüratların necədi?

- Yenidən Azərbaycan Premyer Liqasına qayıtdığım üçün şadam. İnanılmaz hisslər yaşadım. Qayıdışımı qələbə ilə qeyd etmək də çox xoş oldu.

- “Neftçi” ilə matçdakı çıxışını necə dəyərləndirə bilərsən?

- Desəm ki, ideal formadayam, yalan olar. Təbii ki, ilk növbədə Premyer Liqada oyun praktikam çatışmır, 3 ilə yaxın kənarda qaldım. Lakin məyus olmuram. Düşünürəm ki, zamanla hər şey daha yaxşı olacaq.

- 3 illik fasilədən sonra yenidən Azərbaycan Premyer Liqasında forma geyən Elnur Cəfərovda nə dəyişib?

- Daha təcrübəli kimi qayıtdım. Bundan sonra da əlimdən gələni edəcəm ki, həm özüm üçün yaxşı olsun, həm də komandama faydam dəysin.

- “Neftçi” ilə matçda start heyətində yer alacağını gözləyirdin?

- Açığı, gözləmirdim. Allahın qismətidi. Düzdü, meydana çıxacağımı düşünürdüm. Buna görə də matça daha ciddi hazırlaşırdım. Fikirləşirdim ki, baş məşqçi qarşılaşmanın gedişində mənə də şans verəcək. Amma elə oldu ki, ilk 11-likdə şans qazandım. Bu da mənim üçün çox sevindirici idi.

- Qısa müddət “Neftçi”də forma geyinsən də, daha çox “Xəzər Lənkəran”da parlamısan. Lənkəran təmsilçisi üçün “Neftçi” ilə oyunlar prinsipial əhəmiyyət daşıyırdı. “Kəpəz”in heyətində Premyer Liqadakı debütun da “Neftçi”yə qarşı oldu. Rəqibin məhz “ağ-qaralar” olması oyuna köklənməyinə nə dərəcədə təsir etdi?

- Təbii ki, rəqibin “Neftçi” olması motivasiyanı artırır. Hamımız bilirik ki, “Neftçi” köklü klubdu. Amma bu matçda mənə motivasiya verən “Xəzər Lənkəran”, “Neftçi” yox, “Kəpəz” idi. Hazırda Gəncə klubundayam və komandamın uğurları üçün əlimdən gələni edirəm.

- “Kəpəz” növbəti turlarda “Neftçi” üzərindəki qələbənin ardını gətirə biləcək?

- Qarşıda hələ 35 tur var. Başlanğıc yaxşı oldu. Psixoloji üstünlük qazandıq. Çoxları “Neftçi” üzərində qələbə qazanacağımıza inanmırdı. Lakin özümüzə güvənirdik və uğur qazana biləcəyimizə ürəkdən inanırdıq. Əlimizdən gələni edəcəyik ki, bu qələbələr ardıcıl olsun və daim azarkeşlərimizi sevindirə bilək.

İbrahim CƏFƏROV