UEFA-nın Bakıya 1 gündə 3 avrokubok oyunu təyin etməsinin səbəbi məlum oldu

Sabah Bakıda avrokubokların 3 oyunu keçiriləcək. "Qarabağ" Avropa Liqasının, "Neftçi" və "Sabah" isə Konfrans Liqasının oyunu çərçivəsində meydana çıxacaq. Azərbaycan paytaxtı ilk dəfədir ki, bir gündə qitəmiqyaslı turnirin 3 matçını qəbul edəcək. Bu isə nadir haldı. Qitə futbol qurumu qərarını açıqladıqdan sonra bu barədə müzakirələr səngimək bilmir. Əslində “Neftçi” “Beşiktaş”la ilk oyununu səfərdə keçirməli idi. Lakin sonradan UEFA İstanbulda 1 gündə 2 matç keçirilməməsi üçün qarşılaşmanın yerini dəyişdi. Belədə istər-istəməz ortaya sual çıxır: İstanbulda 1 gündə 2 oyun keçirmək olmaz, amma Bakıda nəinki 2, hətta 3 matç keçirmək olar? Deməli, hansısa müəmma var...

Avqustun 10-da Bakıda 3 avrokubok matçının keçirilməsi məlum olduqdan sonra qarşılaşmalardan heç olmasını birinin yerinin dəyişdirilməsi ilə bağlı AFFA-nın UEFA ilə danışıqlar apardığı, lakin nəticə əldə edilmədiyi barədə xəbərlər tirajlandı. Əksəriyyət hətta UEFA Azərbaycana qarşı tutduğu mövqeyə görə qınadı da...

Futbolxeber.az saytı olaraq bu məsələ ilə bağlı araşdırma apardıq və nəticədə həqiqət ortaya çıxdı. Türkiyə Futbol Federasiyasının müraciətinə müsbət cavab verən UEFA-nın Azərbaycana yox deməsi səbəbsiz deyilmiş. Belə ki, qaydalara əsasən, bir şəhərdə eyni gündən birdən artıq komandanın avrokubok matçı keçirməsi ehtimalı varsa, yerli federasiya bu məsələyə daha əvvəl reaksiya verməlidi. Yəni öncədən UEFA ilə danışıqlar aparılmalı idi ki, qitə futbol qurumu özü bu məsələni tənzimləsin. Lakin AFFA bu məsələdə gecikdiyi, vaxtında müraciət etmədiyi üçün sonradan UEFA-dan mənfi cavab alıb. Qitə futbol qurumundan bildirilib ki, indiki halda yalnız rəqib klublarla razılıq əldə olunduqdan sonra hansısa qarşılaşmanın yeri dəyişdirilə bilər. Təbii ki, heç bir klub da bununla razılaşmayıb. Çünki hər bir komanda birinci görüşünü rəqib meydanında keçirmək istəyir. Yəni AFFA “UEFA-ya müraciət etdik, lakin alınmadı” təəssüratı yaratmağa çalışsa da, yuxarıda qeyd etdiyimiz kimi reallıq başqadı.

Məhz AFFA-nın yubanması səbəbindən sabah Bakıda 3 avrokubok oyunu keçirilməli olacaq. UEFA-nın “Beşiktaş”ın müraciətinə müsbət cavab verməsinin səbəbi də Türkiyə Futbol Federasiyasının AFFA-dan fərqli olaraq işinə daha məsuliyyətli yanaşmasıdı. AFFA-nın, bir qədər də konkretləşdirsək, baş katib Sərxan Hacıyevin səriştəsizliyi səbəbindən sabah həm “Qarabağ”, həm “Neftçi”, həm də “Sabah” Bakıda meydana çıxmalı olacaqlar. Bu isə istər azarkeşlər üçün, istər mətbuat üçün heç də arzuolunan hal deyil. Artıq 12 ildi AFFA-da çalışan, illərlə Elxan Məmmədovun müavini olmuş Sərxan Hacıyevin bu məsələdə necə yubanmaya yol verməsi anlaşılmazdı...

Futbolxeber.az