“Səbail” mövsümə niyə uğursuz start verdi? - İdman direktoru səbəbləri açıqladı

"İlk növbədə birinci turdakı rəqibimizi qazandığı qələbə və yeni mövsümə uğurlu start verməsi münasibətilə təbrik edirəm. Təəssüf ki, "Səbail" arzuolunan nəticə qazana bilmədi. Xüsusilə, birinci hissənin əvvəllərində oyunumuz alınmadı”.

Futbolxeber.az saytına açıqlamasında bu sözləri “Səbail”in idman direktoru Zamiq Hüseynov deyib.

Azərbaycan Premyer Liqasının ilk turunda “Sumqayıt”dan alınan 1:4 hesablı məğlubiyyəti şərh edən klub rəsmisi qapılarına təyin olunan mübahisəli penaltinin matçda qırılma nöqtəsi olduğunu vurğulayıb: “Komandamız fasilə  ərəfəsində oyunda dönüş yaratmağı bacardı. İkinci hissədə bərabəlik qolunu vurmaqla yanaşı, oyuna nəzarəti də tam ələ keçirən tərəf "Səbail" idi. Lakin qapımıza təyin olunan və təkcə mənim yox, ünsiyyətdə olduğum bir çox şəxsin də sual işarəsi ilə qarşıladığı penalti oyunun qırılma nöqtəsi oldu. Ötən bir neçə gün ərzində həmin epizodla bağlı müxtəlif fikirlər səsləndirilir. Artıq Hakimlər Komitəsinin sədri Barış Şimşək də məlum məqamla bağlı mətbuata açıqlama verib. Qonağı olduğu televiziya verilişində çox bəsit penalti təyin olunduğunu deyib və bildirib ki, "mən belə epizodda penalti təyin etməzdim". Barış bəyə səmimi açıqlamasına görə təşəkkür edirəm. Lakin indi nə qədər təəssüflənsək də, nəticə dəyişməyəcək”.

Z.Hüseynov qarşıdakı matçlarda hakimlərin daha diqqətli olacaqlarına ümid etdiyini söyləyib: “Hələ mövsüm yeni başlayıb. Qarşıda keçiləcək uzun bir yol var. Komanda olaraq digər oyunlarımız barədə düşünməliyik. Futbol səhvlərin tez-tez rast gəlindiyi idman növüdür. Ümid edirəm ki, hakimlərimiz oyunun nəticəsinə əsaslı şəkildə təsir göstərə bilən qərarların qəbulu zamanı məsələyə daha diqqətlə və daha həssas yanaşacaqlar".

Fərəc ASLANOV