"Neftçi"nin futbolçusu: "Qarabağ" hegemondur, amma vəziyyəti düzəldəcəyik"

“Əvvəl bir az qəribə idi, indi uyğunlaşmışam. Azərbaycanda ən çox bəyəndiyim havadır. Həmişə günəşli olur”.

Futbolxeber.az saytının məlumatına görə, bu sözləri “Neftçi”nin futbolçusu Azər Əiyev “Matç TV”yə müsahibəsində deyib.

Milli komandamızın üzvü qonşu ölkənin mətbuatına Azərbaycan futbolu haqda danışıb: “Klubların yalnız üçündə stadion süni örtüklüdür. "Neftçi"nin qazonu təbiidir. İnfrastruktur baxımından çox yaxşı şərait var. Komanda sayı çox deyil. Daha əvvəl 8 idi, sonra 10 oldu. Sayın 12-yə qaldırılması da müzakirə edilir. Oyunların sıxlığı, komandaların sayı həqiqətən yaxşıdır.

Əksər səfər oyunlarına avtobusla gedirik. Uzaq yerlər Gəncə və Tovuzdur. Təxminən 5-6 saat olur. Uçuş üçün yeganə bölgə Naxçıvandır. Ora da təyyarə ilə təxminən 40 dəqiqə vaxt lazımdır”.

29 yaşlı yarımmüdafiəçi “Qarabağ”la aralarında olan rəqabətdən də danışıb: “İndi ən çox iki komandadan danışırlar - "Neftçi" və "Qarabağ". Bu komandaların oyunlarında hər zaman həyəcan olur. "Neftçi" azarkeşləri və özümüzçün nə qədər üzücü səslənsə də, son illərin nəticələrinə baxdıqda “Qarabağ”ın hegemon olduğu ortaya çıxır. Ancaq ümid edirik ki, vəziyyəti düzəldəcəyik”.

Sankt-Peterburqda keçirilən və "Neftçi"nin də iştirak etdiyi "Matç TV Kuboku"undan da danışan Əliyev bu turnirin onlar üçün yaxşı təcrübə olduğunu bildirib: "Eşitdiyimə görə, "Srvena Zvezda" və "Fənərbaxça" ilə matçlarda anşlaq olacaq. Rəsmi oyuna yaxın atmosfer olur. Turnir Konfrans Liqası matçlarından əvvəl yaxşı təcrübə olacaq".

Futbolxeber.az-ın teleqram kanalına abunə olun