“Neftçi” Sərgən Yalçından əlini üzüb...

Əvvəlcə Emil Balayev, ardınca Filip Ozobiçin transferi... İndi də məlum olur ki, “Neftçi” Fransanın “Pau” klubundan Ervin Koffinin keçidini reallaşdırıb. Əslində, Fil Dişi Sahilindən olan müdafiəçinin adı “ağ-qaralar”la bir müddətdir hallanır. Ötən ay Fransaya yollanan “Neftçi”nin idman direktoru Zaur Əzizovun Ervin Koffi və Miha Blajiçlə danışıqlar apadığı deyilirdi. Lakin sonradan Regekampfın baş məşqçi vəzifəsindən gedişi bu transferləri arxa plana keçirdi. Çünki Sərgən Yalçının baş məşqçi postuna namizəd olması vəziyyəti dəyişmişdi. Türkiyəli mütəxəssis baş məşqçi vəzifəsinə təyinat alsaydı, onun razılığı olmadan bu transferlər reallaşa bilməzdi.

Son günlər baş verən proseslər onu göstərir ki, “Neftçi” artıq Sərgəndən əlini üzüb. Belə olmasaydı, yuxarıda adını çəkdiyimiz futbolçuların transferləri reallaşmazdı. Çünki Sərgən Yalçın “Neftçi”yə gələcəyi təqdirdə, Çempionlar Liqasının qrupu uğrunda mübarizə aparacaq bir kollektiv quracaqdı. Açığını demək lazımdı ki, nə Emil Balayev, nə də Marko Brkiç o iddiada olan komandanın qapısını qoruyacaq səviyyədə deyil. Belədə mütləq əcnəbi qapıçı alınacaqdı. Emil Balayevin gəlişi isə bu ehtimalın üzərindən xətt çəkir.

Gedişat onu deməyə əsas verir ki, “Neftçi” qarşıdakı mövsümdə də aşağı-yuxarı ötənilki komanda səviyyəsində olacaq. İndi əsas sual yeni baş məşqçinin kimliyi ilə bağlıdır. Ehtimal etmək olar ki, “ağ-qaralar” yenə Regekampf səviyyəsində ortabab bir məşqçi ilə anlaşacaq. Həmin məşqçinin nə qədər uğurlu olacağını isə zaman göstərəcək...

İBRAHİM

Futbolxeber.az-ın teleqram kanalına abunə olun