“Sport Ekspress” “Neftçi”dən yazdı: “Bu şərtlər altında çətin ki “Zenit”lə rəqabət apara bilsin”

Rusiyanın nüfuzlu “Sport Ekspress” nəşrinin saytı sabah Sankt-Peterburqda start götürəcək “Matç TV” kubokunun ilk turu çərçivəsində keçiriləcək “Zenit” - “Neftçi” oyunu haqda yazı hazırlayıb.

Futbolxeber.az saytının məlumatına görə, rusiyalı həmkarlarımız Sankt-Peterburq təmsilçisinin optimal olmayan heyətlə belə Bakı klubundan daha güclü olduğu qənaətindədirlər:

“Zenit”in optimal heyətlə - Malkom, Klaudino və digərlərinin oynayıb-oynamayacağı məlum deyil. Lakin hətta onlarsız belə Sankt-Peterburq klubunun start heyəti “Neftçi”dən kifayət qədər əzəmətli və aşkar güclü görünür. Yəqin ki, azərbaycanlıların ilk “11-liy”ində Rusiya Premyer Liqasında faydalı ola bilməyən Mahmudov və Kverkveliya yer alacaq (Rusiyalı həmkarlarımız hələ də “Neftçi” ilə müqaviləsini yeniləməyən Emin Mahmudovun Sankt-Peterburqa aparılmamasından xəbərsizdilər - red.)”.

Yazıda həmçinin “Neftçi”nin hələ də baş məşqçisiz olduğun vurğulanıb: “Bakı klubu son mövsüm çempionatda üçüncü yeri tutub və kubokun finalında “Qəbələ”yə uduzmaqla titulsuz qalıb. O cümlədən də bu səbəbə görə boslar rumın baş məşqçi Laurentsiu Regekampfi istefaya göndəriblər. Lakin ona əvəzləyici tapa bilməyiblər. Odur ki, “Neftçi” yad meydan və tanış olmayan atmosferlə yanaşı, həm də baş məşqçisiz oynayacaq. Bu şərtlər altında “Neftçi” çətin ki “Zenit”lə rəqabət apara bilsin”.  

Xatırladaq ki, sabah “Qazprom Arena”da keçiriləcək “Zenit” - “Neftçi” oyunu Bakı vaxtı ilə 20:30-da start götürəcək.

Futbolxeber.az-ın teleqram kanalına abunə olun