Elxan Məmmədov “Milliyet”ə danışdı: “Türkiyə sübut etdi ki...”

Türkiyənin nüfuzlu “Milliyet” qəzetində FİFA-nın Milli Assosiasiyaları Departamentinin direktoru Elxan Məmmədovun açıqlamaları dərc olunub.

Futbolxeber.az saytı müəyyən ixtisarlarla həmin yazını təqdim edir:

“FİFA-nın Milli Assosiasiyaları Departamentinin direktoru Elxan Məmmədovun Türkiyə Futbol Federasiyasının (TFF) ümumi toplantısından öncə TFF-nin fəaliyyəti, ardınca da İstanbuldakı Çempionlar Liqasının finalı barədə dedikləri böyük maraq gördü.

Türkiyədə baş verən zəlzələnin ardından TFF-nin dərhal “Çiyin çiyinə” kampaniyası ilə yardıma başladığını xatırladan Elxan Məmmədov “Başda TFF-nin prezidenti Mehmet Büyükekşi olmaqla, federasiya rəhbərliyini təbrik etmək lazımdı. Gözəl bir kampaniya ilə zəlzələdən zərər görən insanların yanında oldular”, deyə bildirib.

FİFA-nın Milli Assosiasiyaları Departamentinin direktoru İstanbuldakı ÇL finalından da söz açıb: “İstanbulda futbol bayramı yaşandı. Avropanın 1 nömrəli klub turnirinin finalına şahidlik etdik. Türkiyə sübut etdi ki, ən gözəl və ən peşəkar finalları təşkil edə bilər”.

Sonda E.Məmmədov Türkiyə millisinin Avro-2024-də Latviya və Uels üzərində qazandığı son qələbələrə də toxunub: “Əvvəlcə Türkiyə millisini qazanılan 6 xal münasibəti ilə təbrik edirəm. O gözəl qola imza atan Arda Gülər hər kəsə örnək olacaq. Azərbaycan millisinin Avropa çempionatının finalına yüksəlməsi çətin görünür. Lakin inşallah Türkiyə millisi Almaniyaya yollanacaq”.

Futbolxeber.az-ın teleqram kanalına abunə olun