Oqtay Abdullayev: “Rasim Rəfiyev kimi insanları unutmamalıyıq”

“Rasim Rəfiyev Azərbaycanda kifayət qədər tanınmış şəxs idi. Azərbaycan futbolunda isə onu hamı tanıyır. Ona görə də Rasim müəllimin yaxşılıq etmədiyi insan yoxdu”.

Futbolxeber.az saytına açıqlamasında bu sözləri veteran futbolçu Oqtay Abdullayev dünən 75 illik yubileyi qeyd olunan “Neftçi”nin sabiq rəhbərlərindən biri, 1994-1999-cu illər ərzində klubun əsas sponsoru olmuş mərhum Rasim Rəfiyev barədə danışarkən deyib.

O bildirib ki, əslində Rasim Rəfiyevlə bağlı tədbir çoxdan keçirilməli idi: “Bu gün (söhbət dünən olub) bu cür yubiley tədbirinin keçirilməsi çox xoş oldu. Əslində, bu tədbir çoxdan keçirilməlidi idi. Nəhayət ki, Rəfiyevin 75 illiyi yüksək səviyyədə qeyd edildi. Tədbirin keçirilməsində AFFA-nın, “Neftçi”nin və Veteranlar İttifaqının rolu oldu. Buna görə mən hər kəsə təşəkkürümü bildirirəm. Veteranlar da sağ olsunlar ki, bu tədbirdə iştirak etdilər. Bu veteranların demək olar ki, hamısı Rasim Rəfiyevin rəhbərliyi altında işləyib, hamıya köməyi dəyib. Mənə də onunla “Neftçi”də bir dövrdə işləmək xoşbəxtliyi qismət olub. O, bu cür yubiley tədbirinin keçirilməsinə layiqdi. Biz Rasim Rəfiyev kimi insanları unutmamalıyıq. Əksinə, bu tədbirin gec keçirilməsi bizim səhvimizdi”.

Futbolxeber.az-ın teleqram kanalına abunə olun