“Ayxan Abbasovun rəhbərliyi altında oynamaq mənim üçün çox rahatdı”

“Turan Tovuz”un yeni transferlərindən olan Aydın Bayramovun Futbolxeber.az saytına müsahibəsi

- “Sumqayıt”dan ayrılmağınıza səbəb nə oldu? Klub yeni müqavilə təklif etmədi, yoxsa özünüz getmək istədiz?

- “Sumqayıt”la danışığımız olmuşdu. Komandada qalmağımı istəyirdilər. Yeni müqavilə də təklif olunmuşdu. Sadəcə böyüklərimlə məsləhətləşib “Turan Tovuz”un mənim üçün daha uyğun seçim olduğuna qərar verdim.

- Demək olar ki, bu keçiddə Ayxan Abbasov amili həlledici rol oynadı?

- Bəli. Ayxan Abbasovla “Sumqayıt”da daha əvvəl birgə çalışmışıq. Onun rəhbərliyi altında oynamaq mənim üçün çox rahatdı.

- Maddi baxımdan “Turan Tovuz”la “Sumqayıt”ın təklif etdiyi müqavilə şərtləri arasında nə dərəcədə fərq var idi?

- Seçimimdə pul amili rol oynamayıb. Mənim üçün ilk növbədə rahatçılıqdı. Özümü rahat hiss etməsəm, təklif olunan məbləğin önəmi yoxdu.

- “Turan Tovuz”da daha əvvəl “Sumqayıt”da rəqabət apardığınız Tərlan Əhmədli və təcrübəli Kamal Bayramov var. Bu qapıçılarla əsas heyət uğrunda mübarizə aparmaq çətin olmayacaq?

- Rəqabətdən heç vaxt qorxmamışam. Əksinə, rəqabət hər kəs üçün faydalıdı. Mən heyətə düşmək üçün əlimdən gələni edəcəm. Yekun qərarı isə məşqçilər korpusu verəcək.

- Adətən əksər futbolçular rayon mühitinin darıxdırıcı olmasından gileylənirlər. Bu məqam sizi narahat etmir? Səhv eləmirəmsə, ilk dəfə bölgə klubunda çıxış edəcəksiniz.

- Bəli, ilk dəfədir bölgə klubunda forma geyəcəm. Lakin bu məqam məni narahat eləmir. Hətta deyərdim əksinə, bölgədə oynamaq çox maraqlıdı.

- Yəqin ki, rəsmi müqaviləyə imza atdıqdan sonra Ayxan Abbasovla söhbətiniz olub. Komandanın iddiası nə olacaq, “Turan Tovuz” hansı hədəflər uğrunda yarışacaq?

- Düzdür, Ayxan müəllimlə ümumi söhbətimiz olub. Amma konkret hədəflər barədə hələ ki danışılmayıb. Döyüşkən bir kollektiv olacağımıza inanıram.

- Amma istənilən halda komandanın potensialına da, ölkə çempionatındakı rəqiblərə də bələdsiniz. Necə düşünürsüz, “Turan Tovuz” avrokuboklara iddia edə bilər?

- Mövsümün gedişində bunu biləcəyik. İndiki halda yalnız onu deyə bilərəm ki, bacardığımız qədər turnir cədvəlinin yuxarı pillələrində qəarlaşmaq üçün vuruşacağıq.

- “Turan Tovuz” Aydın Bayramovun milliyə qayıdışında körpü rolunu oynaya biləcək?

- Məqsədlərimdən biri də məhz budur. Daha əvvəl milliyə dəvət alırdım. Ölkənin 1 nömrəli komandasının şərəfini qorumaq hər bir futbolçunun arzusudu, o cümlədən də mənim. Odur ki, yenidən milliyə qayıtmaq üçün əlimdən gələni edəcəm.

ibrahim CƏFƏROV

Futbolxeber.az-ın teleqram kanalına abunə olun