“Neftçi” - Sergen Yalçın danışıqlarının detalları: “Bunlar olmadan mənə 5 milyon da versəz...”

Dünən Bakıda olan türkiyəli mütəxəssis Sərgən Yalçınla “Neftçi” rəhbərliyi arasında aparılan danışıqların detalları məlum olub.

Futbolxeber.az saytının əldə etdiyi məlumata görə, tərəflərin maaş məsələsində anlaşama bilməməsi barədə yayılan xəbərlər həqiqəti əks etdirmir. Daha dəqiq desək, Sərgən Yalçının özü ilə bağlı hər hansı bir problem yoxdu.

Türkiyəli mütəxəssis “Neftçi” rəhbərliyinin istəklərini öyrəndikdən sonra öz şərtlərini irəli sürüb. Müqavilə imzalanması üçün də bu şərtlər klub tərəfindən qəbul olunmalıdı. Sərgən Yalçın bildirib ki, “Neftçi”nin qarşıya qoyulan məqsədlərə çatması üçün yaxşı komanda qurulmalıdı. Bura məşqçilər korpusu, heyətə cəlb olunacaq futbolçular və s. daxildi. Söhbət heç də 1-2 futbolçudan getmir. Türkiyəli mütəxəssis qeyd edib ki, “Neftçi”nin planlarını həyata keçirmək üçün istənilən komanda formalaşmasa, özünə ildə lap 5 milyon maaş ödənilsə belə, qarşıya qoyulan məqsədə çatmaq mümkün olmayacaq: “Mən sehrbaz deyiləm ki, indiki heyət, yaxud əlavə 1-2 futbolçu ilə nəticə verim”.

Bir sözlə, hazırda ilk növbədə Sərgən Yalçın “Neftçi”dən cavab gözləyir. Türkiyəli mütəxəssisin şərtləri qəbul olunsa, o, tezliklə müqaviləyə imza atacaq.

İbrahim CƏFƏROV

Futbolxeber.az-ın teleqram kanalına abunə olun