Ayxan Abbasov: “Məğlub olmamaq bizim üçün vacib idi”

“Bu gün azarkeşlərimizi sevindirmək istəyirdik. Onlara qələbə hədiyyə etməyə çalışsaq da, alınmadı. Amma digər tərəfdən də məğlubiyyətsiz oyunlar seriyamız davam edir. Mövsüm ərzində heç vaxt ardıcıl dörd məğlubiyyətsiz oyunumuz olmamışdı. Ona görə də bu gün məğlub olmamaq bizim üçün çox vacib idi”.  

Futbolxeber.az saytının məlumatına görə, bu sözləri “Turan Tovuz”un baş məşqçisi Ayxan Abbasov “Səbail”lə oyundan sonra deyib.

O, 2:2 hesablı heç-heçəni belə şərh edib: “Oyun istədiyimiz kimi alındı, qollar vurduq. Yenə də fərqlənə bilərdik. “Səbail”in ikinci hissədə dəyişikliklər edəcəyini bilirdik. “Sumqayıt”la matçda da bu cür etmişdilər. Həmin görüşdə görmüşdük ki, sonradan meydana çıxan futbolçular oyunu dəyişə bilirlər. Bizdə isə son yaxın yorğunluq var idi. Kamal Bayramov zədəli oynadı”.

Abbasov “Turan Tovuz”un Premyer Liqadakı ilk ilinin pis keçmədiyini bildirib: “Oyunumuzu daha da yaxşılaşdırmaq istəyirik. Bu mövsüm məqsəd Premyer Liqada qalmaq idi. Sevindirici haldır ki, altıncı pillədə möhkəmləndik. Hətta turnir cədvəlində daha yuxarı qalxa bilərdik. Amma həlledici matçlarda təcrübəsizlik buna imkan vermədi. İlk ilimizin pis keçmədiyini deyə bilərəm. Gələcək bundan da çətin olacaq. Rəqiblər güclənəcək, ona görə biz də güclənməliyik. Son matçdan sonra yeni mövsümün planlarını daha ətraflı müzakirə edəcəyik”.

Mütəxəssis son turlar futbolçuları motivasiya etməkdə çətinlik çəkmədiyini bildirib: “Bəli, son görüşlər bizim üçün turnir cədvəli baxımından ciddi önəm kəsb etmir. Amma əsas odur ki, komandadakı ah-hava, futbolçuların yanaşması yaxşıdır. Heç bir futbolçunun hansısa oyunda həvəssiz olmasını görməmişəm. Komandanı yığanda götürdüyümüz futbolçuların bir çoxu klublarında oynamaq şansı qazanmırdılar, bəziləri isə hətta futboldan kənar qalmışdılar. Çətin anlarda belə komandada istək var idi. Kubokda uduzandan sonra futbolçulara bildirdim ki, çempionatdakı son 5 qarşılaşma bizim üçün finala bərabərdi. Gələcəyimiz üçün vacib matçlardı. Çox şükür ki, artıq 4 oyun keçib və heç birində uduzmamışıq, 10 xal toplamışıq. İnanıram ki, son turda “Qarabağ”a qarşı da layiqli müqavimət göstərəcəyik. Mövsümün sonunda yorğunluq olması normaldı. Bu gün də buna şahid olduq. Amma əsas odur ki, komandada istək var idi”.

“Turan Tovuz”un çalışdırıcısı hazırkı heyətində aparıcı üzvlərinə yeni müqavilə təklif etdiklərini bildirib: “Natan Oduvaya təklifimizi etmişik. Cavab gözləyirik. Oduva, məncə, Tovuzda qazandı. “Turan Tovuz”dakı karyerası onun üçün uğurlu oldu. Azərbaycan çempionatına uyğunlaşdı, özünü göstərə bildi. Daha əvvəl “Keşlə”də qol vura bilməmişdi. Amma tək Natan yox, komandada saxlama istədiyimiz bütün futbolçularla danışırıq. Kim qalmaq istəyəcəksə, onunla müqaviləni yeniləyəcəyik. Digər klubların futbolçularımıza maraq göstərməsi normaldı”.