Tərlan Əhmədov: “Bezsəydim, qorxsaydım, bu gün burada olmazdım”

“Mövsüm sona yaxınlaşdıqca komandalarda yorğunluq hiss olunur. Uduzsaq da, oyundan sonra futbolçularıma təşəkkür etdim. Bilirəm ki, uzaq yol gedib-gəlmək onları yorur. Bunun nəticəsində artıq komandada zədəlilər də çoxalıb”.

Futbolxeber.az saytının məlumatına görə, bu sözləri “Kəpəz”in baş məşqçisi Tərlan Əhmədov Azərbaycan Premyer Liqasının 35-ci turunda “Neftçi”yə 1:3 hesabı ilə uduzduqları matçdan sonra deyib.

O, doğma meydanda çıxış etməməyin komandasını yorduğunu bildirib: “Minimum məqsəd Premyer Liqada qalmaq idi. Bunun öhdəsindən gəldik. Buna baxmayaraq, mövsümü yüksək əhval-ruhiyyə ilə bitirmək istəyirik. Amma bu gün qələbə qazanmaq alınmadı. Artıq biz də yorulmuşuq. Yol bizi çox yorur”.

Əhmədov komandanı Premyer Liqada saxlamasına baxmayaraq, klub rəhbərliyindən yeni müqavilə təklifi almaması haqda sualı belə cavablandırıb: “Bu sualı rəhbərliyə versəz, daha yaxşı olar. Yazırlar ki, guya kimlərəsə yalvarmışam ki, mənə hansısa komandada iş versinlər. Bu günə kimi heç kimə ağız açmamışam. Rəhbərlik istəsə, işimizə davam edəcəyik. "Kəpəz"i sevən insanlar mənə deyirlər ki, komandadan getmə. Bu günə qədər heç bir təklif olmayıb. İşim göz qabağındadır. Hazırda son oyunu fikirləşirəm. Müqavilə barədə heç nə deyə bilmərəm”.

Mütəxəssis qeyd edib ki, elə də yüksək olmayan büdcə ilə də komanda formalaşdırmaq mümkündür: “AZAL-ın büdcəsi 155 min manata endiriləndə işləmişəm. Futbol aləmində bütün çətinlikləri görmüşəm. Az büdcə ilə komanda formalaşdırmaq olar. Qalsam, ən yaxşı nəticəni qarşıma məqsəd qoyacağam. Şərait olsa, çalışaram ki, komanda mükafatçılar sırasında olsun”.

“Kəpəz”in çalışdırıcısı digər klublardan təklif alması haqda yayılan xəbərlərin düzgün olmadığını söyləyib: “Yox, heç bir klubdan təklif almamışam. Mənimlə heç kim əlaqə saxlamayıb. Özüm də heç kimə ağız açmamışam”.

“Kəpəz” son turda “Qəbələ” ilə qarşılaşacaq. T.Əhmədov qeyd edib ki, matça qədər 5 gün ərzində Qəbələdə qalmağa komandanın imkanı yoxdur: “Beş gün Qəbələdə qalmaq üçün böyük vəsait lazımdır. Ona görə də geri qayıtmağa məcburuq”.

“Kəpəz”in çalışdırıcısı öz işinə qiymət vermək istəməyib: “Öz işimlə bağlı heç nə deyə bilmərəm. İşimizə ictimaiyyət qiymət verə bilər. Sadəcə onu deyə bilərəm ki, qarşımıza qoyulan məqsəd Premyer Liqada almaq idi, ona da çatdıq”.

Bütün çətinliklərə baxmayaraq, o, çətinliklərdə qorxmadığını vurğulayıb: “Bezsəydim, qorxsaydım, bu gün burada olmazdım. Təhdidlər də var. Heç vaxt bunları açıqlayası deyiləm. Həyatım boyu heç vaxt qorxmamışam. Yenə bu hadisələr olsa, işimə davam edəcəm. Əksinə, bu cür hallar məni motivasiya edir”.