Qurban Qurbanov: “Sonuncu çempionluq daha vacib və şirin olur”

“Futbolçularımı təbrik edirəm. Bu il çox əziyyət çəkdilər. Həm avrokuboklarda, həm çempionatda oynadıq. Sıx qrafik var idi. Amma şükürlər olsun ki, hər şey düşündüyümüz kimi alındı”.

Futbolxeber.az saytının məlumatına görə, bu sözləri “Qarabağ”ın baş məşqçisi Qurban Qurbanov Azərbaycan Premyer Liqasının XXXIV turunda “Səbail”i 3:0 hesabı ilə məğlub etdikləri və çempionluğu rəsmiləşdirdikləri oyundan sonra deyib.

Təcrübəli mütəxəssis komandasının qızıl medallara layiq olduğunu bildirib: “Bəzən zədəlilər, gedənlər oldu. Buna baxmayaraq, tempi qoruyub-saxlaya bildik. Futbolçularım bu çempionluğa layiq idi. Azarkeşlərimizin sevinci, bizimlə olması qüvvət verir. Onlara təşəkkür edirəm. Hələ qarşıda iki oyunumuz var”.

O, bu çempionluğun əvvəlkilərdən fərqini belə izah edib: “Hər çempionluq sanki daha vacib olur. Çünki tələblər çoxalır. Hər dəfə çempion olduqda yenə səndən çempionluq gözləyirlər, rəqiblər daha ciddi hazırlaşırlar. Bu il bunun şahidi olduq. Nə qədər çətin oyunlarımız var idi. "Səbail" də bu gün çox yaxşı hazırlaşmışdı. Futbolçular elə səviyyəyə gəlib çıxır ki, heç bir rəqib digərindən çəkinmir. Sonuncu çempionluq daha vacib və şirin olur. Görünən odur ki, daha çox əziyyət çəkməliyik. Hansısa titulu əldə etdikdə sanki rahat nəfəs almağı düşünürük. Amma belə deyil. Əksinə, bizim rahat olmağa, futbol haqda düşünməməyə vaxtımız yoxdur. Azarkeşlər, sizlər, rəhbərlik tələblər edir. Çempionluq bitdi, qarşıdakı turnirə hazırlaşmalıyıq. İlboyu işin içindəyik. Hər çempionluq daha vacib və dəyərli olur”.

Qurbanov “Qarabağ”ın 10-cu dəfə çempion olmaqla ilkə imza atmasına da münasibət bildirib: “Hər çempionluq istənilən klubu daha da böyüdür. 10-cu çempionluq və iki böyük ulduz, klubun tarixinə düşür. Çox sevinirəm ki, mənim dönəmimdə oldu. Buna uğurumuzun bir hissəsi kimi baxırıq”.

“Qarabağ”ın çalışdırıcısı son 2 tura da ciddi yanaşacaqlarını qeyd edib: “Rotasiyalar olacaq, bu, qaçılmazdır. Mövsümboyu çox yorulan futbolçularımız var. Ola bilər ki, onlara başqa proqram tutaq. Bunu məşqçilərlə müzakirə edəcəyik. Əvəzedici heyətdən futbolçu götürməyə gəldikdə, belə fikrimiz yoxdur. Çünki, bizdə az oynayanlar yetərincə çoxdur. Onlara şans verməyi düşünəcəyik. Futbolçularımın hər birinə güvənirəm. Abdullah Zubir, Bədavi Hüseynov zədələnmişdi, bu gün yox idilər. Digər yorulan futbolçularımız da var. Ümumi, düzgün plan cızacağıq”.

Təcrübəli çalışdırıcı daha çox çempionluq qazanmaq istədiyini vurğulayıb: “Daha çox çempionluq qazanmaq istəyərdim. İmkan varsa, daha çox çempion olmaq istəyərdik. Nə qədər buradayıq, futboldayıq, hər turnirdə maksimumu verməyə çalışacağıq. Çox istəyərdik ki, daha irəli gedək”.

O, Diakabi və Benzianın durumuna da söz açıb: “Bizim düşüncələrimizlə bu gün hər ikisi optimal formada olmalıydılar. Əfsuslar olsun ki, düşüncələrimiz düzgün olmadı. Sadəcə futbolda bəzən düşünmədiyin nəticələr, transferlər olur. Kimə daha çox güvənirsən, bəzən daha çox zədələnir. Abbas Hüseynov komandada fiziki cəhətlərinə görə üstünlərdəndir. Amma qış hazırlığında bəsit epizodda zədələndi. Buna görə sizə cavab verməyə ehtiyat edəcəm. Get-gedə zədələri geridə qoyacaqlar. Benziada hansısa problem olacağını düşünmürəm. Normal durumdaydı, əzələ problemi oldu. Diakabidə zədə sümük nahiyyəsindədir deyə, uzun çəkə bilər. Hər bir halda, hazırlıq dönəmində komanda ilə məşqlərə başlayacaqlar”.

Q.Qurbanov hələlik komandadan kimlərin gedəcəyini müəyyənləşdirmədiyini söyləyib: “Həmişə futbolçularımı qoruyub-saxlamaq istəmişəm. Qarşılıqlı razılıq əldə olunmayanda, ayrılırıq. Gələcəklərlə danışıqlar gedir. Bəzən 100 faiz alınası futbolçu alınmır. Danışıq aparırıq. İndidən sonra daha ciddi danışacağıq. Çox istəyərdim ki, kollektiv tam qalsın və bir neçə nəfər də əlavə edilsin”.