Regekampf: “Qarabağ”a futbolçu verməyimiz mümkün deyil”

“Oyunu özümüz çətinləşdirdik. Birinci yarıda sürətli oynamırdıq. Əks-hücumda rəqibə imkanlar yaradırdıq. Bilirdik ki, bu cür matçlarda belə şeylər baş verir. Oyunçularla bu haqda danışmışdıq”.

Futbolxeber.az saytının məlumatına görə, bu sözləri "Neftçi"nin baş məşqçisi Laurentsiu Regekampf Azərbaycan Premyer Liqasının 27-ci turunda bu gün "Kəpəz"lə keçirilən oyundan sonra mətbuat konfransında deyib.

O, 2:2 hesabı ilə başa çatan matçı belə şərh edib: "Şanslarımız yarandıqda qola çevirsəydik, oyun daha da açıq keçərdi və hər şey istədiyimiz kimi olardı. Qol vurduq, geridönüş yaratdıq. İkinci qolu vurduqdan dərhal sonra qol buraxdıq. Üçüncü qolu da vurduq, oyundankənar vəziyyət oldu. Sonda da belə hesab qeydə alındı. Gözlədiyimiz oyun olmadı, amma irəliyə baxırıq. Çempionatda fasilə yaranacaq, çalışacağıq ki, daha yaxşı hazırlaşaq. Futbolçuların arxasında dayanaraq, onlara özünəinam vermək istəyirik".

Rumın mütəxəssis "Neftçi"nin sayılmayan qolu haqda isə bunları bildirib: "Arxamızda tribunada hamı deyirdi ki, təmiz qoldur. Ola bilsin ki, referidən fərqli görürük. Amma bunu şərh etmək istəmirəm. Sadə epizod idi, görə bilərdi. Elə də çətin qərar deyildi. Bir epizodda oyunçu iştirak etmirsə, ona görə qərar verə bilməzsən. Ömər Buludov içəri qaçdı, amma top ondan arxada idi, topa aidiyyatı yox idi. Hakim belə qərar verdilər".

Regekampf  "Qarabağ"ın baş məşqçisi Qurban Qurbanovun "Qalatasaray"la oyun üçün 2-3 futbolçuya ehtiyacları olduğunu və digər klublarımıza müraciət edəcəklərinə dair açıqlamasına münasibət bildirib: "Bizim özümüzün də yoldaşlıq oyunumuz var. Əsas heyətdən 6-7 futbolçu millilərdə olacaq. İstədiyimiz proqramla davam etmək üçün U-19-dan oyunçular cəlb etdik. Hər komandanın öz proqramı var. Düşünürəm ki, bu cür addım atmaq çətin olar. Təsəvvür edin ki, oyunçularımız başqa komandalar üçün oynayacaq və zədə alacaq. Ödənişləri kim edəcək? Düşünürəm ki, bu, mümkün deyil".