Tərlan Əhmədov: "Neftçi"dən xal almaq böyük nəticədir"

"Maraqlı oyun izlədik. İtkilərə baxmayaraq, komandanı motivasiya etmişdik. Əzəli rəqiblə derbidə yaxşı mübarizə aparıb xal götürmək vacib idi. Komandam gözəl mübarizə apardı. Yaxşı oynadıq. Hesab böyük də ola bilərdi, biz də onlar da qalib gələ bilərdi".

Futbolxeber.az saytının məlumatına görə, bu sözləri "Kəpəz"in baş məşqçisi Tərlan Əhmədov Azərbaycan Premyer Liqasının 27-ci turunda "Neftçi"də ilə keçirilən səfər matçından sonra mətbuat konfransında deyib.

O, 2:2 hesablı bərabərliyi belə şərh edib: "İntizamlı oyunumuz məni daha çox sevindirir. İnkişaf edirik. Qalib gələ bilən komanda kimi formalaşırıq. Oyuna görə futbolçularıma təşəkkür edirəm. Çox xallar itirmişik. Öz səhvlərimizdən də, hakim səhvlərindən də. Oyun göstərdi ki, düz yoldayıq və fasilədən sonra problemləri həll edib, komandanı bir balaca da yuxarı qaldıra bilərik. Azarkeşlərə təşəkkür edirəm. Veteran futbolçulara da həmçinin.

"Neftçi" də böyük klubdur, "Kəpəz" də. Amma "Kəpəz" uzun müddətdən sonra Premyer Liqaya qayıdıb. Yeddinci aydır buradayıq. "Neftçi"dən xal almaq böyük nəticədir. Çünki yeni formalaşırıq. Heç-heçə ədalətli nəticə idi. Hər iki komandanın şansı var idi. Səfərdə qazanılan bir xal düzgün, uğurlu yolumuzda təkan olacaq".

T.Əhmədov qeyd edib ki, əsas məqsədləri Premyer Liqada qalmaqdır: "Ağır qrafikdir. Komandanın buna qədər və bu gün göstərdiyi oyun ümid verir ki, Premyer Liqada  qalaq. Qarşıma qoyulan məqsəd liqada yerimizi qorumaqdır. Çalışıram ki, 6-7-ci yerlərdə olaq. Bura gələndə deyirdilər ki, hara gedirsən, orada futbol oynamırlar. Amma futbolçuların oynadığı oyunu görürsüz. Onlara təkliflər var".

Baş məşqçi futbolçularını bugünkü oyuna çox asan motivasiya etdiyini bildirib: "Komanda yenidir, formalaşma prosesi gedir. Stabil oyundan söhbət gedə bilməz. Çalışıram ki, 3-4 oyun stabillik, qələbələr olsun. Möcüzə yaradacaq bir şeyim yoxdur. Hədəfim odur ki, "Kəpəz" liqada qalsın. Kimisə büdrətmək haqda düşünmürəm. Hər rəqibə fərqli hazırlıqla gedirəm. Futbolçuları ən çox motivasiya etdiyim oyun bugünkü idi. Səkkiz dəqiqə matç haqda təlimat vermişəm. Digər görüşlərdə isə 20-25 dəqiqə. Çünki futbolçular nə etməli olduqlarını bilirdilər".

Əhmədov "Hansısa komanda Premyer Liqanı tərk etməlidir, yoxsa çempionatda klub sayı artmalıdır" sualını belə cavablandırıb: "İstəyərəm ki, cənub bölgəsindən komandamız olsun, Zaqatalaya böyük futbol qayıtsın, şimaldan da həmçinin. 16 komanda olsun, Premyer Liqada klub sayı artsın. Hər rayonumuzda həyata baxış fərqlidir. "Şəmkir" tarixində ilk dəfə ÇL-də mərhələ keçib. Amma bu gün yada salınmır. "Simurq", "Xəzər Lənkəran", "Bakı" yoxdur. Onları qaytarsaq, hərəsindən 1-2 futbolçu çıxarsaq, kənardan milliləşdirilmiş oyunçu gətirmərik. Hər halda qərarı AFFA İcraiyyə Komitəsi verir. Artırılsa, daha yaxşı olar".