Samir Abasov: “O qol “Neftçi”nin qapısına vurulsaydı, saatlarla VAR-a baxılardı”

"Yalnız məğlubiyyətə görə üzülürük. Komandamın oyunundan razıyam. Hər iki hissədə yaxşı oynadıq. Getdikcə daha güclü olacağıq. Yeni oyunçularımıza oyunu tutmaq üçün bir az vaxt lazımdır. Futbolçularımı təbrik edirəm".

Futbolxeber.az saytının məlumatına görə, bu sözləri "Sumqayıt"ın baş məşqçisi Samir Abasov Azərbaycan Premyer Liqasının 21-ci turunda "Neftçi"yə uduzduqları matç (0:2) barədə danışarkən deyib.

Təcrübəli mütəxəssis fərdi səhvlərdən qollar buraxmalarına toxunub: "Bunlar futbolçuların üzərində olan şeylərdir. Belə məqamların əziyyətini çəkirik. 3 məğlubiyyəti belə şeylərə görə yaşamışıq. Komanda olaraq rəqibdən daha yaxşı idik. “Neftçi”dən zərrə qədər çəkinmirik. Son zərbə anlarında da çatışmazlıqlar var. Əks halda, qollar da vura bilərdik. Neçənci oyundur mərkəz müdafiəçisiz oynayırıq. Bu da təsir edir. İkinci qolda qayda pozuntusu var idi. Amma əmin deyiləm. İlk qol “Neftçi”nin qapısına vurulsaydı, saatlarla VAR-a baxılardı. Rəqib futbolçulara bir neçə qırmızı vərəqə də verilə bilərdi. Amma bəzi məqamlarla bağlı tam əmin də deyiləm".

Abasov ehtiyatda kifayət qədər futbolçularının olmaması barədə bunları deyib: "Bu, zədəlilərlə bağlıdır. İki mərkəz müdafiəçimiz zədəlidir. Onlardan biri olsa, heyətdəkilərin azı biri ehtiyatda olar. Daha oyunçu transfer etməyəcəyik. Transfer pəncərəsi bizim üçün bağlanıb. Kamran Əliyevin sənədləri düzəlsə, problem yaşamayacağıq".

"Neftçi"nin sabiq baş məşqçisi olan S.Abasov paytaxt təmsilçisinin heç nə ilə diqqətini çəkmədiyini deyib: "Xeyr, “Neftçi” heç nə ilə diqqətimi çəkmədi. Biz bu gün daha yaxşı oynadıq. Bilirsiz ki, həmişə səmimi danışıram".