Qurban Qurbanov: “Qapıçı transfer etmək istəyirik”

“Qarabağ”ın baş məşqçisi Qurban Qurbanov Azərbaycan Premyer Liqasının 19-cu turunda səfərdə “Turan Tovuz”a qarşı keçirilən oyundan sonra mətbuat konfransı keçirib.

Futbolxeber.az saytının məlumatına görə, təcrübəli mütəxəssis komandasının 3:2 hesablı qələbəsini belə şərh edib: “İlk dəqiqələrdən gərgin oyun getdi. Çox möhkəm, qış fasiləsindən sonra daha da formalaşmış komandaya qarşı oynadıq. Rəqibin hücumları müdafiə xəttimizə çox çətinliklər yaratdı. Bu da Ayxan Abbasovun oyun üslubundan biridir. Rəqib 2 dəfə hesabı bərabərləşdirsə də, futbolçularım əzmkarlıq göstərdilər və qalib gələ bildik”. 

Qurbanov komandasında müəyyən qədər yorğunluq olduğunu bildirib:“Antalyadan Bakıya deyil, birbaşa bura gəlmişdik. Futbolçularda istər-istəməz yorğunluq var idi. Bununla belə, çox vacib 3 xal qazandıq. Rəqib komandaya da, tovuzlu azarkeşlərə də uğurlar arzu edirəm”.

“Qarabağ”ın çalışdırıcısı transferlərlə bağlı da danışıb: “Qapıçı transfer etmək istəyirik. Hələ ki danışıqlar gedir. Qarşıda bir neçə gün vaxtımız var. Məqsədimiz tək Lukanın deyil, əlimizdə olan bütün futbolçuların idman formasını yaxşılaşdırmaqdır. Bu gün qapıçılar da daxil, hər bir futbolçumuza güvənirəm. Qarşıdakı oyunlarda onlardan daha yaxşı performans gözləyirəm”.

Qurbanov bəzi futbolçularının adını “Qarabağ”la yanaşı hallanmasına belə münasibət bildirib: “Ancaq danışıqlar gedir. Hələ ki real bir şey yoxdur”.