"Səbail" üçün ilk - "Professor"la oldu

Mahmud Qurbanov bu mövsümdən baş məşqçisi olduğu "Səbail"in tarixinə düşüb. 

Futbolxeber.az saytının məlumatına görə, "dənizçilər" 2016/17 mövsümündən yarışdığı Azərbaycan Kubokunda ilk dəfə yarımfinala "Professor" ləqəbli hazırkı çalışdırıcısıyla çıxıb.

Özü də bu, turnirin favoritılərindən sayılan "Sabah"ı hər 2 oyunda məğlub edərək (evdə 3:2, səfərdə 1:0) mübarizədən kənarlaşdırmaqla reallaşıb. Bu, Qurbanov üçün də baş məşqçi kimi ilk yarımfinal olacaq. 

"Səbail" bunadək 4 dəfə yarımfinalı bir addımlığında olsa da, hər dəfə 1/4 finalda dayanıb. Bu, Premyer Liqada debüt mövsümü olan 2017/18-də Samir Əliyevin, 2018/19, 2020/21 və 2021/22 mövsümlərində Aftandil Hacıyevin baş məşqçiliyi dövründə olub.

Maraqlıdı ki, "Səbail" "Sabah"la Kubokda ilk dəfə görüşürdü və bu, ona tarixi nəticə gətirdi. O da maraqlı məqamdı ki, "dənizçilər" bu uğurlu matçdan əvvəl Premyer Liqada son pilləyə düşmüşdü.

Onu da bildirək ki, 49 yaşlı Qurbanov futbolçu kimi Azərbaycan Kubokunu ən çox qazananlardan biridi - 4 dəfə. Bu, 2 dəfə "Kəpəz"lə, hərəyə 1 dəfə "Neftçi" və "Xəzər Lənkəran"la olub.

Xatırladaq ki, "Səbail" növbəti ili aprelində keçiriləcək yarımfinalda "Qəbələ"ylə qarşılaşacaq (Sport24.az).