“Neftçi”dən açıqlama: “Regekampfın müqaviləsində elə bir bənd yoxdur”

“Neftçi”nin baş məşqçi Laurentsiu Regekampfla imzaladığı müqavilədə 350 min avro təzminat qarşılığında istənilən vaxt klubdan ayrıla biləcəyi ilə bağlı bənd yoxdur.

Futbolxeber.az saytına klubdan verilən məlumata görə, rumın mütəxəssisin “Neftçi”ni “Styaua”ya dəyişəcəyi barədə deyilənlər həqiqəti əks etdirmir. Regekampf hazırda bütün fikrini “Neftçi”yə yönəldib və komandanı növbəti oyuna hazırlaşdırır.

Qeyd edək ki, Rumıniyanın Prosport.ro saytı Laurentsiu Regekampfın tezliklə “Neftçi”ni “Styaua”ya dəyişə biləcəyi barədə iddia ilə çıxış edib. Bildirilib ki, Buxarest klubu Regekampfın təyinatını rəsmiləşdirmək üçün “Neftçi”yə 350 min avro təzminat ödəməlidir. Çünki rumın mütəxəssisin "ağ-qaralar"la müqaviləsində belə bir bənd var.

Qeyd edək ki, Laurentsiu Regekampfın "Neftçi" ilə 2024-cü ilin yayınadək müqaviləsi var.