Məzən olsun, "Sabah" - QEYD

AFFA-nın nəzdində Apellyasiya Arbitraj Tribunalı fəaliyyət göstərir. Premyer Liqa və I Divizion klubları İntizam Komitəsinin hər hansısa qərarı ilə razılaşmadıqları halda, Apellyasiya Arbitraj Tribunalına müraciət etmək hüququna sahibdirlər. Amma bu quruma müraciət edərkən şikayətə baxılması üçün klub min manat məbləğində ödəniş etməlidir. Qaydalara görə, şikayət təmin edildiyi halda, həmin vəsait geri ödənilir. Yox, şikayət təmin edilmədikdə isə, loru dildə desək, min manat batır.

Bu günə qədər bir çox klublar Apellyasiya Arbitraj Tribunalına hər hansı məsələ ilə bağlı şikayət ediblər. Şikayəti təmin edilənlər də olub, edilməyənlər də. Əksər hallarda klublar tribunala ağır cəza, yaxud külli miqdarda cəriməyə görə üz tuturlar. 

Bu günlərdə "Sabah" klubu da Apellyasiya Arbitraj Tribunalına müraciət edib. Paytaxt təmsilçisi Azərbaycan Premyer Liqasının 5-ci turunda "Səbail"lə matçda azarkeşlərin meydana kənar əşyalar atmaları səbəbindən 1600 manat məbləğində cərimələnib. Lakin klub rəhbərliyi bu qərarla razılaşmadığından Apellyasiya Arbitraj Tribunalına üz tutub. Təbii ki, 1000 manat da ödəniş olunub. Lakin yekunda "Sabah"ın şikayəti təmin edilməyib. Bu isə o deməkdir ki, klub 1600 manatdan əlavə, daha min manat ziyana düşüb. 

Görəsən, klubun başbilənləri hansı məntiqlə 1600 manata görə 1000 manatı riskə atmaq qərarına gəliblər? Büdcəsi 10 milyona yaxın olan klub həqiqətənmi 1600 manatlıq cəriməyə görə bu qədər narahat olub? 

Fikrimizcə, burda söhbət puldan getmir. "Sabah"ın 1 futbolçusunun aylıq maaşı 10 belə cəriməni ödəməyə yetər. Bu klubla AFFA arasında münasibətlərin qaydasında olmadığı haqda tez-tez eşidirik. Böyük ehtimalla, bu şikayət də məhz həmin ədavətdən qaynaqlanır. Kimlərsə daha ağıllı görünməyə cəhd ediblər. Gəl ki, 1600 manata görə 1000 manatı riskə atanlar özlərini gülüş hədəfinə çevirməkdən başqa heç nəyə nail ola bilmədilər. Necə deyərlər, bu vəziyyətdə "Sabah" asqırıb qabağa düşmək istəsə də, öskürüb geri düşdü. 

FUTBOLXEBER.AZ