Ramin Musayev: "Hakimliklə bağlı məsələdə AFFA-nı günahlandırmaq lazım deyil”

“Bütün komandaları yeni mövsümün startı münasibətilə təbrik edirəm”.

Futbolxeber.az saytının "Report"a istinadən verdiyi məlumatına görə, bunu Peşəkar Futbol Liqasının prezidenti Ramin Musayev Azərbaycan Premyer Liqasının 2022/2023 mövsümünün püşkatma mərasimində deyib.

PFL rəhbəri "Turan Tovuz" və "Kəpəz"i çempionata qayıtmaları münasibəti ilə də təbrik edib: "Qarabağ" və Qurban Qurbanovun zəhməti nəticəsində Azərbaycan xalqı çox sevindi. Klub rəhbərliyi və xüsusən də Qurban Qurbanovun zəhməti nəticəsində Azərbaycan xalqı çox sevindi. Bunun nəticəsi idi ki, matç bitsə belə, insanlar stadiondan getmək istəmirdilər. Arzu edirəm ki, digər komandalarımız da bizi sevindirsinlər".

Musayev Premyer Liqada 10 komandanın iştirak etməsinin yaxşı olduğunu bildirib: "Klublarımız səviyyəli legioner gətirməyə çalışmalıdır. Elə legioner gətirin ki, ehtiyatda qalmasın. Gənclər onlardan nələrsə öyrənsin. Yoxsa gəlib bizim futbolçulardan öyrənməsinlər".

R.Musayev qeyd edib ki, “Kəpəz” ev oyunlarını bir müddət Bakıda keçirə bilər: "Bizim nümayəndə bir ay əvvəl Gəncə stadionunda olub. AFFA rəhbərliyi də bilir ki, orada bəzi problemlər var. Bunlar aradan qaldırılmasa, tələb edəcəyik ki, orada oyun keçirməsinlər”.

O, "Turan Tovuz"un da ev oyunlarını Bakıda keçirmə ehtimalına da münasibət bildirib: "Sırf stadionda işıqlandırma probleminə görə oyunların paytaxtda keçirilməsi düzgün deyil. İnanıram ki, orada başqa problemlər də olmayacaq. Lakin süni işıqlandırma üçün də az pul getmir. Bu, klubun illik büdcəsinin yarısı qədərdir".

PFL prezidenti hakimlik mövzusuna da toxunub: "Hakimliklə bağlı məsələdə AFFA-nı günahlandırmaq lazım deyil ki, bəzi hakimləri itirdik”.

O, AFFA Hakimlər Komitəsinin sabiq sədri Frits Ştuxlikin fəaliyyətindən narazılığını gizlətməyib: "Bəzi hakimlərimizi itirdik. Rəhim Həsənov FIFA referisi olsa da, hakimlikdən getdi. Səbəbi də bəlli deyil. Gedənin arxasınca danışmazlar. Buna da şükür. Ən azından 3-4 hakimimiz qaldı. Artıq hakimlərə türkiyəli qardaşımız rəhbərlik edəcək".