Sənan Qurbanov: "Məğlub olmaq istəmirik"

“Qəbələ”yə qarşı səfərdə oynamağın həmişə çətin olduğunu bilirdik. Yaxşı hazırlaşmışdıq. Rəqib son turlarda məğlub olsa da, yaxşı futbol oynayırlar".

Futbolxeber.az saytının məlumatına görə, bu sözləri "Keşlə"nin baş məşqçisi Sənan Qurbanov Azərbaycan Premyer Liqasının 21-ci turunda "Qəbələ" ilə bu gün keçirilən oyundan sonra mətbuat konfransında deyib.

O, 1:1 hesabı ilə başa çatan matçın belə şərh edib: "Burada məğlub olmaq istəmirdik. İlk hissəni bizim aktivimizə yazmaq olar. Oyun başlayandan diktə edən tərəf biz idik. Qolumuzu da vurduq. Fasilədə paltardəyişmə otağında futbolçulara konsentrasiya haqda çox danışdım. Amma təəssüflər olsun ki, fasilədən sonra ilk dəqiqələrdə qol buraxdıq. 40 dəqiqədən çox azlıqda oynadıq. Futbolçular əziyyət çəkdilər, çox çətin idi. Səfərdə bir xal qazandıq. Növbəti matçlara hazırlaşacağıq".

Sənan Qurbanov görüşün baş hakimi Fərid Hacıyevin bəzi qərarlarındna narazı qaldığını bildirib: "Gənc hakimdir. Biz də istəyirik ki, onlar inkişaf etsin. Amma cərimələr, kartlar hamısı bizim əlehimizə idi. Qırmızı vərəqə verilən epizoda baxmaq lazımdır. “Qəbələ”nin oyununa kölgə salmaq istəmirəm, amma mən gördüyümü deyirəm. Hər xırda foullar bizi aqressivləşdirdi. Əgər qırmızı vərəqə yox idisə, demək ki, bu, oyuna təsir etdi".

S.Qurbanov əlavə edib ki. başqa komandaların onlara 3 xal gözü ilə baxmalarını istəmir: "Bilirik ki, heç bir komanda aşağı liqaya yuvarlanmayacaq. Amma sonuncu pilləni tutmaq istəmirik. Məğlub olmaq istəmirik. Futbolçulara bunu aşılamaq niyyətindəyəm. Başqa komandaların bizə potensial 3 xal kimi baxmaqları adama təsir edir. Futbolçulara da bunu aşılayıram ki, heç kim bizə 3 xal gözü ilə baxa bilməz. Mübarizə aparmalıyıq".