“Qarabağ”, “Kayrat”, “Bazel” kimi komandalarla oynamaq təcrübə qazandırır”

“Qarabağ”ın Konfrans Liqasının qrup mərhələsindəki rəqibi “Omoniya”nın (Kipr) baş məşqçisi Henninq Berq qrupdakı komandalar haqqında fikirlərini bölüşüb.

Futbolxeber.az saytının məlumatına görə, 52 yaşlı mütəxəssis 1-ci turda “Kayrat”la (Qazaxıstan) matçdan əvvəl təşkil edilən mətbuat konfransında Ağdam təmsilçisi kimi klublarla eyni qrupda yer almağın komandasına təcrübə qazandıracağını bildirib:

“Mübarizə apardığımız yarışlarda əsas məqsədimiz qələbə qazanmaq, çempion olmaqdır. Konfrans Liqasında da əlimizdən gələni edəcəyik. Amma mənim üçün Kipr çempionatı daha üstündür. Konfrans Liqasındakı rəqabət inkişaf etmək üçün yaxşıdır. Eləcə də maddi gəlir baxımından da şansdır. “Qarabağ”, ”Kayrat”, ”Bazel” kimi komandalarla oynamaq Avropada təcrübə qazandırır”.

Qeyd edək ki, bu gün keçiriləcək “Kayrat” – “Omoniya” matçı Bakı vaxtı ilə saat 18:30-da başlayıb.  "Qarabağ"la "Omoniya" arasında ilk oyun isə sentyabrın 30-u Kiprdə olacaq.